831 Бардыгы /

БИШКЕК. «Баарыбыз биргеликте аксап жаткан билим берүү тармагын оңдошубуз керек! —деп белгиледи Кыргыз Республикасынын Президенти Сооронбай Жээнбеков бүгүн Жогорку Кеңеште билим берүү жана илим министри Каныбек Исаковдун ант берүү аземинде.

Мамлекет башчысы адегенде Өкмөт мүчөсү Каныбек Исаковду куттуктап, берген анттын зор маанисин сезе билип, эл-жерибизге, Кыргыз мамлекетине жан дили менен, ак кызмат кылуусун гана каалады.

– Буга чейин билим берүү министрлигине сын-пикирлер арбын айтылып келди. Билимдин сапатына, сабактардын көлөмүнүн көптүгүнө,китеп басып чыгаруунун кемчиликтерине нааразылыктар көп болду. Бул тармакка бөлүнгөн акча каражаттары жылдан жылга көйөбүп баратат. 1-октябрдан тартып мугалимдердин айлыгы 30пайызга көбөйдү. Бирок, билим берүү тармагына каражат көбөйгөнү менен, тилекке каршы,эл талап кылгандай, абал оңдолуп кеткен жок. Бул министрликтин жетекчилигинин аракети,адамдык фактордун абдан көп таасиринен болуп жатат. Ошондуктан ,жаңы министрдин жоопкерчилиги, ага артылган жүк жана ишеним чоң! —деп баса белгиледи Президент Сооронбай Жээнбеков.

Мамлекет башчысы жаңы министрдин тажрыйбасы бар, билим чөйрөсүн терең түшүнөт, буга чейин мыкты иштеген, жакшы иштеп берээрине терең үмүтүн билдирди: – Бирок, ишти оңдоп кетүү жалгыз эле министрдин колунан келбейт. Билим берүү тармагы улуттун жана өлкөнүн келечегин аныктайт, билим менен гана жаркын келечекти курабыз. Ошондуктан, бир адамдан үмүттөнүп, четте гана карап турбастан, баарыбыз чогуу бул тармакты, биргеликте оңдошубуз кажет!

Президент Сооронбай Жээнбеков жаңы министрге жоопкерчиликтүү ишинде ийгиликтерди гана тиледи.

Алишер ТОКСОНБЕВ, өз кабарчы