825 Бардыгы /

НЬЮ-ДЕЛИ. Нью-Дели шаарында Кыргыз Республикасынын Индиядагы Элчиси Асейин Исаев  Индиянын Коргоо министри Раджнат Сингх менен жолугушту. Анда Кыргызстан менен Индиянын ортосундагы аскердик-техникалык кызматташтыкты чыңдоо маселелери талкууланды.

Жолугушуу маалында бул өңүттөгү кызматташуу Азия континентиндеги тынчтыкты, стабилдүүлүктү жана коопсуздукту сактоо боюнча өз ара кызыкчылыктын негизинде гана жүрөөрү баса белгиленди. Бул багыт Кыргызстан менен Индиянын ортосундагы стратегиялык өнөктөштүктүн деңгээлин толтуруунун жалпы жараянын кубаттоого гана багытталган бир катар долбоорлор менен бекемделүүдө. Бул долбоорлордун ичинен өзгөчө орунду БУУ желеги астында дүйнөнүн ар кайсы «жаңжал болуп жаткан» өлкөлөрүндө тынчтыкты сактоо иш-аракеттерин аткаруучу аскердик талаа ооруканасын түзүү болуп саналат. Биздин өлкөлөрүбүздүн ортосунда үзгүлтүксүз биргелешкен окуулар жана тоолуу аймактарга даярдоо боюнча биомедициналык изилдөөлөр өткөрүлүп турат.

Тараптар аскердик-техникалык кызматташтыкты мындан дагы күчөтүү, биргелешкен долбоорлорду жүзөгө ашыруу, Индия ийгиликтүү ишке ашырып жаткан аскер чөйрөсүндөгү тажрыйбалар менен бөлүшүү боюнча макулдашышты. Индия аскердик мүмкүнчүлүктөрү боюнча дүйнөдө төртүнчү орунда, куралдуу күчтөрүнүн саны боюнча үчүнчү орунду ээлейт.

Алишер ТОКСОНБАЕВ, өз кабарчы