2,069 Бардыгы /

2019-жылдын 12-16-сентябрь күндөрү Индияда өткөн “күжүрмөн самбо” боюнча мелдеште Кыргызстандын атынан катышкан жигиттер байгелүү орундарды камсыздашкан. Алардын ичинен “Шумкар” атайын багыттагы полкунун Жалал-Абад шаарындагы өзүнчө ротасынын кызматкерлери да көкүрөктөрүнө медаль тагып келишкен.

Алардын бири Мурзабаев Эмилбек Жаныбекович 1996-жылы 6-октябрда Жалал-Абад облусунун Сузак районунун Орто-Азия айылында жарык дүйнөгө келген. Аскерден келген соң 2016-жылдын октябрь айында ИИОнун курамына жумушка алынган. Ошол учурдан тартып спорттун “күжүрмөн самбо” түрү менен машыгып, көптөгөн ийгиликтерге жетишкен. Тактап айтканда:

• 2016-жылы Ош шаарындагы мелдеште 68 кг салмакта 2-орун;
• 2017-жылы Бишкек шаарында ИИМдин атайын кызматтар арасында болгон мелдешинде 68кг салмакта 1-орунду багындырып “Краповый Берет” наамын алган;
• 2017-жылы КРнын биринчилигинде 62 кг салмакта 3-орун;
• 2018-жылы В. Гордеевдин жаркын элесине арналган Эл аралык мелдеште 68 кг салмакта 1-орун;
• 2019-жылы КРдин биринчилигинде 68кг салмакта 3 – орун,
• 2019-жылдын сентябрь айында Индия мамлекетинин Дели шаарында өткөн Азия биринчилигинде 68кг салмакта 2-орунду багындырган.

Индиядан байгелүү келген дагы бир “Шумкар” атайын багыттагы полкунун Жалал-Абад шаарындагы өзүнчө ротасынын кызматкери Тайлаков Нурсултан Мусаевич. Ал1993-жылы 7-сентябрда Ош облусунун Өзгөн районунда туулган. ИИОго 2014-жылы январда кабыл алынган. Жаштайынан спортко кызыккан Нурсултан 2015-жылдан тарта спорттун “күжүрмөн самбо” түрү менен машыга баштаган. Аны ийгиликке жеткирген бул спорттун түрүнөн Нурбек Самидинов жана Раев Замирбек тарбиялаган. Буга чейин Кыргызстан биринчилигинде 2-орунду багындырып, Азия оюндарына жолдомо утуп алган. Азияда өз мыктылыгын көргөзгөн Нурсултан ал жактан да байгелүү 2-орунду камсыздап, кыргыз желегин Индияда желбиретип келди.

Бул жигиттер спорттогу жетишкендиктеринен сырткары коомдук коопсуздукту камсыздоодо, кылмыштуулук менен күрөшүүдө өз салымдарын кошуп келишүүдө. Спортчуларга мындан ары да кыргыз желегин эл аралык мелдештерде желбиретип, ийгиликтерди багындырышын каалайбыз!

Жалал-Абад ОИИБнин басма сөз кызматы