2,393 Бардыгы /

Калкты таза суу менен камсыздоо долбоорунун алкагында Сузак районунун Кыз-Көл айыл аймагындагы Каду, Ак-Тоок жана Кыз-Көл айылдарына ичүүчү суу менен камсыздоо иштери жүрүп жатат.

Анын алкагында үстүбүздөгү жылдын 22-октябрында Каду айылына 500 метр кубдук 2 суу кампа курулушунун капсуласы салынып, ага Кыргыз Республикасынын Өкмөтүнүн Жалал-Абад областындагы ыйгарым укуктуу өкүлү Кыянбек Сатыбалдиев катышты.

Аталган аймактагы калкты ичүүчү суу менен камсыздоо системаларын куруу, реабилитациялоо боюнча курулуш иштерин ОсОО “Астас” курулуш компаниясы жүргүзүп жатат. Ал эми суу түтүктөрүн жаткыруу иштери 2019-жылдын август айынын аягында башталып, учурда 6 миллион сомдук иш аткарылган.

-Август айында тендер жарыяланып, биз 85,080 млн. сомго утуп алдык жана ишти ушул эле айдын аягында баштадык. Учурда өзүбүздүн каражатыбыздан 6 млн сомдук иш бүткөрүп койдук. Бул жерде 15 жумушчу иштеп жатат. Келишим боюнча 2020-жылы сапаттуу бүтүрүү менен ноябрь айында же ага жетпей тапшырабыз, – дейт Батырбек Бедиев “Астас” курулуш  ЖЧКсынын башкы инженери.

Реаблитациялык иштери аягына чыкса Кыз-Көл айыл аймагындагы 6000 ге жакын калк ичүүчү суу менен камсыз болот. Аталган айыл аймактагы таза суу менен камсыздоо долбоору республикалык бюджеттин эсебинен каржыланып жатат.

-Буйруса бул 85 млн сомдук долбоор аяктаса, Кыз-Көл айыл аймагынын Каду, Ак-Тоок, Кыз-Көл айылдары таза суу менен камсыз болот. Анын арасында 6 миң калк, 3 орто мектеп, 2 бала бакча, 1 үй-бүлөлүк дарыгерлер тобу бар. Бизде айыл өкмөт боюнча 15 миң калкыбыз бар. Бардык эле айыл таза суу менен камсыз болду деп айта албайбыз. Суу башаттарынан, булактардан суу тарттырып иштетип жүргөнбүз бирок, заман талабына ылайык ар бир үйдөн чыга турган таза суу долбоорлорун ишке ашырып жатабыз. Кийинки жылкыга да ушул маселе боюнча башка долбоорубуз бар. Ал да ишке ашса, буйруса айыл аймак таза суу менен толук камсыз болот, – дейт Автандил Кушбаков Кыз-Көл айыл аймагынын башчысы.

Кошумчалай кетсек, област боюнча 441 айыл аймак болсо, анын 179 айылында ичүүчү суу жетишпейт. Учурда 48 айылда таза суу долбоору башталган. Анын 24у республикалык бюджеттен каржыланууда.

Бүбүсара ОРОЗАЛИЕВА, “Аймак”