747 Бардыгы /

Колумбия округунун федералдык соту АКШнын Мамлекеттик департаментин жакынкы 30 күндө Кошмо Штаттар менен Украинанын өз ара мамилесине тиешелүү документтерди жарыялоого милдеттендирди. Бул тууралуу Washington Post гезити жазды.

Сотко American Oversight уюму кайрылып, мамлекеттик катчы Майк Помпео менен президент Дональд Трамптын жеке юристи Рудольф Жулианинин кат жазышууларын көрсөтүүнү талап кылган.

Демократтар басымдуулук кылган Өкүлдөр палатасы өткөн айда Дональд Трампка импичмент жарыялоо жараянынын алкагында иликтөө баштаган.

Буга Трамптын Украинанын президенти Владимир Зеленский менен телефондон сүйлөшкөнү тууралуу чалгын кызматындагы булактын маалыматы негиз болгон. Анда Трамп өзүнүн башкы саясий атаандашы Жо Байден менен анын уулу Украинада эмне кылып жүргөнүн иликтөөнү талап кылганы айтылган.

Иликтөөнүн жүрүшүндө Мамлекеттик департаменттин бир нече өкүлү көрсөтмө берди. Өкүлдөр палатасындагы республикачылар демократтарды иликтөөнү сыр тутуп, Трамптын күнөөлүү экенин тастыктаган гана бөлүктөрүн прессага берип жатат деп айыпташууда. Күн мурун 30дай республикачыл конгрессмен кезектеги угуу болуп жаткан жыйынга кирип келип, отурумга катыштырууну талап кылган. Демократтар алар иликтөө жүргүзүп жаткан комитеттердин мүчөлөрү эмес экенин, жабык жыйынга катышууга укуктары жок экенин билдиришкен.

Буга байланыштуу Пентагондун Украина жана Орусия менен болгон аскердик мамилелерине жооптуу кызматкери Лора Купердин көрсөтмөсү беш сааттык кечигүү менен башталган. Ага Украинага быйыл жайында бериле турган аскердик жардам эмне себептен кечеңдегени тууралуу суроо берилген. Демократтар Трамп Украинага кысым көрсөтүү үчүн аскердик жардамды атайын кечеңдеткен деп эсептешүүдө.

www.