634 Бардыгы /

Түркмөнстанда мамлекеттик басылмаларга жапырт жазылуу өнөктүгү башталды. «Азаттык» радиосунун түркмөн кызматы кабарлагандай, бул жолкусунда мектеп окуучулары дагы гезит-журналдарга жазылууга мажбурланууда.

Өлкөдө мамлекеттик кызматкерлер жана студенттер өкмөттүк басылмаларга милдеттүү түрдө катталышы керек. Катталган соң каражат алардын айлык акысы жана стипендиясынан кармалып турат.

– Мары облусундагы ишкана кызматкерлери гезит-журналдарга милдеттүү түрдө жазылышы керектиги айтылды. Мектеп окуучуларына дагы «Гунеш» журналына жазылуу үчүн каникулдан кийин 14 манаттан (расмий курска ылайык,3,5 манат 1 долларга барабар) ала келиши керектиги эскертилди, — деп билдирди радионун аймактык кабарчысы.

Анын айтымында, билим берүү мекемелеринин кызматкерлери жазылуу үчүн 40-50, саламаттык сактоо кызматкерлери 50-100 жана мунайгаз тармагындагы жумушчулар 50-60 манаттан тапшырып жатышат.

Түркмөнстанда гезит-журнал саткан күркөлөр аз. Жарандар мамлекеттик басылмаларды өтө сейрек сатып алышат.

Учурда өлкөдө 30га жакын гезит жана андан бир аз көбүрөөк журнал чыгат. Алардын негизги багыты мамлекеттик пропаганда жана өлкө жетишкендиктерин даңазалоо болуп эсептелет.

www.