1,765 Бардыгы /

ЖАЛАЛ-АБАД. Ноокен районунун Масы айыл аймагында “Ас-Салам” фонду 80 турак жай ошону менен катар мектеп, бала бакча, тигүү цехи, ФАП, мечит, устакана кошо куруп жатат.

Анын капсуласын салуу иш-чарасына Кыргыз Республикасынын Өкмөтүнүн Жалал-Абад областындагы ыйгарым укуктуу өкүлү Кыянбек Сатыбалдиев, “Ас-Салам” кайрымдуулук фондунун түштүктөгү өкүлү Эркин Исаков, райондун акими Эркинбек Маматаев, айыл өкмөт башчылары, райондук мекеме-ишкана жетекчилери жана тургундар катышышты.

Турак жай жана башка курулуштар үчүн жергиликтүү бийлик 9 гектарга жакын жер бөлүп берген. Тандалып алынган бул аймакта буга чейин мектеп да, бала бакча да болгон эмес. Аталган социалдык объектилер бүткөрүлсө, жергиликтүүлөрдү жумуш менен камсыздоо жагы да орун алат. Ошондой эле жаңы айылга таза суу, жол маселеси курулуш менен бирге бүткөрүлөт. Өз кезегинде Өкмөт өкүлү Кыянбек Сатыбалдиев, ири комплекстин курулушу ийгиликтүү аякташы үчүн район элинин биримдиги болуп, курулушка моралдык колдоо көрсөтүү керек экенин баса белгиледи.

Аталган фонддун өкүлү Э.Исаков үйлөрдү бир жылда куруп бүтүүнү ниет кылышкандыгын билдирип, жергиликтүү бийликтен документ иштерин тезирээк бүткөрүп берүүсүн суранды. Ошондой эле бул үйлөргө жакыр, жетим-жесирлер гана жашасын деген талабын койду.

“Ас-Салам” фонду Кыргызстанда 7 жылдан бери иштеп келет. Фонддун максаты элге жакындан көмөк көрсөтүү жана жакырчылыктан жоюу болуп саналат. 7 жыл алкагында 300гө чукул мечит, 50гө жакын ФАП, ооруканаларды курушкан. Ал эми Жалал-Абадда аталган фонд 3 жылдан бери иштеп, бул аралыкта 100дөн ашуун мечит, 30га жакын ФАП курууга жетишкен.

Кошумчалай кетсек, Ноокен районунун Масы айыл аймагында 26 миң калк жашаса, анын 20%ын жакырлар түзөт.

“Аймак”