Аймак

ПРЕЗИДЕНТ СООРОНБАЙ ЖЭЭНБЕКОВ БШКнын ЖАҢЫЛАНГАН ИМАРАТЫНА БАШ БАКТЫ

ПРЕЗИДЕНТ СООРОНБАЙ ЖЭЭНБЕКОВ БШКнын ЖАҢЫЛАНГАН ИМАРАТЫНА БАШ БАКТЫ

 612 Бардыгы /

БИШКЕК. Президент Сооронбай Жээнбеков Кыргыз Республикасынын Шайлоо жана Референдумдарды өткөрүү боюнча Борбордук шайлоо комиссиясынын (БШК) жаңыланган имаратына баш бакты. Адегенде өлкө жетекчисин БШК төрайымы Нуржан Шайлдабекова 2018-2020-жылдарга карата Шайлоо мыйзамдарын жакшыртуу стратегиясына ылайык түзүлгөн Жарандык билим берүү жана Шайлоо технологиялары Борборунун ишмердүүлүгү менен кенен-чонон тааныштырды.

Жарандык билим берүү жана Шайлоо технологиялары Борбору мындан ары шайлоо жараянына катышуучулардын укуктук маданиятын жогорулатуу жана аларды агартуу максатында атайын Программаларды, семинарларды, лекцияларды, илимий-практикалык конференцияларды, тегерек үстөлдөрдү, окутуу тренингдерин жана башка иш-чараларды байма-бай уюштурат. Ошондуктан, Президент бардык аймактарда Борбордун Программасын тең жана кеңири жайылтуу үчүн облустардагы жогорку окуу жайлар менен өз ара мамилесин толук кандуу камсыздоо боюнча пландарды дагы ачык колдоду. Борбордун иш-чараларынын бардык жарандарга жеткиликтүүлүгүн туруктуу камсыздоо зарылдыгын баса белгилеп, электрондук окутууларды жүргүзүүдө салттуу форматтарды дагы, заманбап санариптик технологияларды деле үзгүлтүксүз колдонууга катуу үндөдү.

БШК төрайымы Нуржан Шайлдабекова мүмкүнчүлүгү чектелген жарандардын шайлоо укуктарын жүзөгө ашырууну мындан ары жакшыртуу жана шайлоо жараянына жаштардын активдүү катышуусун жогорулатуу боюнча иштер туурасында дагы баян этти. Мындан тышкары шайлоо маалында колдонулуучу жабдыктар жайгаштырылган залды кыдырып көрүштү.  Бул жакта жарандар шайлоо технологияларынын иши менен кенен таанышып, добуш берүү системасын тесттик режимде иштетип дагы көрө алышат. Ошондой эле аймактык шайлоо комиссияларынын өкүлдөрү менен онлайн-видео конференциясы өткөрүлүп, алар Баткен облусунун Лейлек районундагы Жаңы-Жер айылындагы жанаТалас облусунун Бакай-Ата районундагы Кең-Арал айылындагы өткөн Айыл өкмөттөрүн шайлоонун жыйынтыктары туурасында өзүнчө баян этишти. Чүй облусунун Москва районунун жана Жалал-Абад облусунун Тогуз-Торо районунун аймактык комиссияларынын өкүлдөрү  дагы онлайн-видео конференцияда алдыда өтүүчү жергиликтүү Кеңештерге шайлоолорго карата даярдыктар туурасында маалымат беришти. Андан ары Президент Сооронбай Жээнбеков БШК мүчөлөрү менен маңдай-тескей пикир алышуу маалында саясий жана экономикалык тармактарда ачык жана калыс атаандаштык болгондо гана өлкөбүздү өнүктүрүү мүмкүн экендигин дагы бир жолу баса белгиледи. Ал ошондой эле БШКнын башкы вазийпасы бардык деңгээлдеги шайлоолордун ачык-айкындыгын камсыздоо жана шайлоо системасынын платформасын туруктуу түзүү экендигин катуу эскертти.

-Шайлоо системасынын ачык-айкын жана туура иштөөсү БШКмүчөлөрүнүн, аймактык комиссиясынын кызматкерлеринин кесипкөйлүгүнөн жана адамдык сапаттарынан дагы түздөн-түз көз каранды, —деп таамай белгиледи мамлекет башчысы Сооронбай Жээнбеков.

Президент Сооронбай Жээнбеков БШК мүчөлөрүн жана аппарат кызматкерлерин Шайлоо комиссиясынын түптөлгөндүгүнүн 30 жылдыгы менен дагы чын ыкластан куттуктады.

Алишер ТОКСОНБАЕВ, өз кабарчы

Автор

Байланыш дареги

Email: aymak.kg@mail.ru

Телефон: +996 (770) 81-00-32

Факс: +996 (3722) 2-32-36

Адрес: Жалал-Абад ш. Ленин к. 17