1,113 Бардыгы /

ОШ. Ош шаарынын вице-мэри Асылбек Топчубаев жетектеген жумушчу комиссия Манас-Ата аймактык Кеңешинде жай     ланышкан көп кабаттуу үйлөрдү кыдырып, аларга жылуулуктун берилиши менен жеринде таанышты. Буга улай Оштогу облустар аралык балдар ооруканасына дагы баш багышты.

– Шаарыбыздагы 607 көп кабаттуу үйдүн 288ин «Жылуулук менен камсыздоо» ишканасы, ал эми 317син Ош жылуулук электр борбору жылытат. Ар түрдүү себептерге байланыштуу калаадагы он беш көп кабаттуу үй бул түйүндөргө таптакыр кошулган эмес. Ошентсе дагы, тиешелүү кызматтарга бардык үйлөрдү толук кандуу жылуулук менен камсыздоо жагы катуу тапшырылды. Мындай маалда көп кабаттуу үйлөрдүн жашоочулары жертөлөсүндөгү акыбалга өздөрү гана такай көз салууга тийиш. Ошондой эле алардагы ремонт иштерин дагы өздөрү жүргүзүүгө милдеткер! – деп кошумчалады Ош шаарынын вице-мэри Асылбек Топчубаев.

Ошого карабастан көп кабаттуу үйлөрдүн жертөлөлөрүн ремонттоого жана үйлөрдү жылытууга керектелчү каржынын жарымы – элүү пайызы жыл сайын Ош шаарынын бюджетинин эсебинен каржыланып келатат. Ал эми социлдык мекемелер жылуулук менен үзгүлтүксүз гана камсыз этилет.

Ош шаарынын вице-мэри Асылбек Топчубаев баса белгилешинче, көп кабаттуу үйлөрдүн басымдуу жашоочулары эшик-терезелерин сапаттуу жылуулаганга анчалык деле маани беришпейт. Анан буга Аймактык Кеңештер дагы жетиштүү көңүл бурушпайт. Болбосо, Кыргызстандын Түштүк башкалаасына жылуулук 7-8-ноябрдан баштап эле бериле баштады. Адегенде социалдык обьектилер – саламаттыкты сактоо, агартуу мекемелери, анан гана көп кабаттуу үйлөр ысытыла баштады.

Алишер ТОКСОНБАЕВ, өз кабарчы