1,233 Бардыгы /

БИШКЕК. Президент Сооронбай Жээнбеков балеттин артисттери, жаш жубайлар Надырбек уулу Канат жана Ирина Сапожникова менен жолугушту. Аларга мамлекеттик сыйлыктарды тапшырып, бейформал маанайда баарлашты, алардын кесипкөйлүк ишмердигине дагы абдан кызыкты.

Мамлекеттик сыйлыктарды тапшырып жатып, Президент Сооронбай Жээнбеков бул алардын көп жылдык талыкпас эмгектеринин натыйжасы экендигин баса белгиледи. «Кыргыз Республикасынын Эмгек сиңирген артисти» ардактуу наамы Мамлекеттик академиялык Мариинск театрынын Приморск филиалынын балет артисти Надырбек уулу Канатка ыйгарылды. Ал эми Кыргыз Республикасынын Ардак грамотасы менен Мамлекеттик академиялык Мариинск театрынын Приморск филиалынын прима-балеринасы Сапожникова Ирина Константиновна сыйланды. Сыйлыктар Шанхай кызматташтык уюмуна мүчө-мамлекеттердин башчыларынын Кеңешинин жыйынын өткөрүүгө даярдыктарга жигердүү катышкандыктары үчүн тапшырылды.

Буга дейре Надырбек уулу Канат жана Ирина Сапожникова өлкөбүздө жок болгондуктан, маданият ишмерлерине сыйлыктарды тапшыруу иш-чарасына катыша албай калышкан. Бул жолу алар СССРдин эл артисти Чолпонбек Базарбаевдин 70 жылдыгына арналган «Балет, балет…» аталышындагы балет искусствосунун Эл аралык фестивалына катышуу үчүн Кыргызстанга келишкен.

Президент Сооронбай Жээнбеков артисттерди үйлөнүшү менен дагы кызуу куттуктап, аларга узун жана бактылуу үй-бүлөлүк жашоо тиледи. Экөөнү тең Кыргызстанга көбүрөөк каттап, жайкы эс алууну Ысык-Көлдө өткөрүүгө чакырды.

Алишер ТОКСОНБАЕВ, өз кабарчы