СҮЙМӨНКУЛ ЧОКМОРОВ – КЫРГЫЗ КЕРЕМЕТИ

2,623 Бардыгы /

БИШКЕК. Президент Сооронбай Жээнбеков СССРдин Эл артисти, Кыргыз ССРинин Эл сүрөтчүсү Сүймөнкул Чокморовдун 80 жылдыгына арналган салтанаттуу иш-чарага катышты. Анда Мамлекет башчысы Сүймөнкул Чокморовдун өлкөбүздүн сыймыгы, Кыргыз элинин улуу сүрөткери, мыкты кино актеру, таланттуу уулу экендигин баса белгиледи.

– Журтубуздан мындай залкар таланттын чыкканы бизге сыймык тартуулайт. Анын өмүр жолу, кылган эмгеги элибиздин тарыхында урмат-сый менен өзгөчө бийик орунду ээлеп калат, —деп баса белгиледи Президент Сооронбай Жээнбеков.

Президент кинематографиядагы «Кыргыз керемети» менен Кыргыз сүрөт өнөрүндөгү жетишкендиктерди Сүймөнкул Чокморовдун тагдырынан бөлүп кароо таптакыр мүмкүн эмес экендигин өзгөчө белгиледи. Ал кайталангыс кино актердук таланты менен бүткүл дүйнөгө өзүн гана эмес, эркиндикти сүйгөн жалпы Кыргыз эллин жана анын жашоосун, маданиятын таанытып, суктанткандыгын дагы жашырган жок. Сүймөнкул Чокморовдун Кыргыз маданиятына кошкон салымы анын кино искусстводогу ишмердүүлүгү менен гана чектелбестен —ал таланттуу сүрөтчү, кыл калемдин устаты катарыдагы эң мыкты эмгектерди жараткан.

-Ошентсе дагы, эң жогорку бааны — өзүнүн улуу замандашы, пикирлеши Чыңгыз Айтматовдун «Сүймөнкулдун кош канат таланты —сүрөтчүлүгү менен кино актерлугу жалаң гана Кыргыз искусствосуна эмес, жалпы дүйнөлүк маданиятка таандык!» деген сөздөрүнөн тапсак болот. Сүймөнкул агабыз —залкар талант гана эмес, абийири бийик, адамгерчилиги терең инсан, мекенчил адам, чыныгы Кыргыз уулунун символу, улуттук намыстын бийик үлгүсү дагы калды, —деп өзгөчө белгиледи Президент Сооронбай Жээнбеков.

Мамлекет башчысы Кыргыз эли, Кыргыз жери дагы ушундай таланттарды жаратаарына катуу үмүт кылаарын дагы кыйытты. Ошондой эле Улуттук киноматография ишмерлерин келе жаткан кесиптик майрамы — Кыргыз киносунун күнү менен чын ыкластанкуттуктады.

-Сиздердин Кыргыз маданиятына сиңирген эмгегиңиздерге терең таазим этебиз! Сиздерге терең ыраазылык билдиребиз, бар болуңуздар! Сиздердин артыңыздардан таланттуу киночулардын жаш мууну өсүп келатат. Ар кандай Эл аралык фестивалдарда жеңишке жетишип, элибиздин ыраазылыгына ээ болуп жатышат. Кыргыз киносунун керемети дагы жаралат деп үмүт кылабыз. Сиздер Улуттук маданиятыбызды дагы байытып, өлкөбүздүн өнүгүүсүнө татыктуу салым кошосуздар деп тереңи шенем! Кино чөйрөсүндө Сүймөнкул Чокморовдой залкар таланттар дагы жаралат деп дагыле катуу үмүт кылабыз! —деп кебин жыйынтыктады Президент Сооронбай Жээнбеков.

Бул иш-чаранын алкагында театрлаштырылган пролог, Сүймөнкул Чокморовдун жашоосу жана чыгармачылык жолу тууралуу даректүү тасма, ошондой эле концерттик программа дагы тартууланды.