808 Бардыгы /

МИНСК. Минск шаарында «Жаш дипломат» жаштар клубунун кезектеги жыйынында Кыргыз Республикасынын Тышкы иштер министрлигинин 75 жылдыгына арналган «Элчи менен сүйлөшүү» аттуу иш-чара өткөрүлдү. Мунун алкагында Белорус достук коому жана маданий байланыштар Достук үйүндө аталган мааракеге арналган көргөзмө дагы уюштурулду. 

Аталган иш-чаранын алкагында белорусиялык студенттер, жаштар жана окуучулар Кыргызстандын өзгөчөлүгү,кооздугу жана жаратылышы тууралуу «Кыргызстан менен таанышуу» аттуу тушоо кесүүсүн тартуулашты. Кыргыз Республикасынын Белорусиядагы Элчиси Эрмек Ибраимов  жаштардын алдында чыгып сүйлөп, анда Кыргыз дипломатиясынын тарыхы, дипломатиядагы  белгилүү инсандар, мындан тышкары быйыл республикалык деңгээлде 80 жылдыгы белгиленип жаткан белгилүү мамлекеттик ишмер Батыралы Сыдыковдун ишмердүүлүгү туурасында дагы баян этти.

Кыргыз Элчиси Эрмек Ибраимов  андан аркы сөзүндө Кыргыз-Белорус мамилелерине өзгөчө көңүл буруп, Кыргызстан менен Белорус достук байланыштары Срвет мезгилинен бери  өнүгүп келе жаткандыгын, ошону менен катар эки өлкөнүн ортосундагы экономикалык байланыштарды мындан ары дагы өнүктүрүү маанилүүлүгүн белгиледи. Ал эми иш-чаранын катышуучулары Кыргызстандын тарыхына жана өнүгүшүнө байланыштуу түрдүү суроолорду, тактап айтканда элибиздин руханий баалуулуктары, билим берүү  системасы жана кошуна өлкөлөр менен алакалары тууралуу  соболдорду Элчиге узатышты. Буга улай Белорус жаштары Кыргызстан тууралуу өздөрүнүн билимин «Кыргызстанды биз кандайча билебиз?» аттуу блиц-суроого катышып, Кыргыз жана Белорус акындарынын ырларын дагы көркөм окушту.

Ошентип, иш-чаранын аягында Кыргыз Республикасынын Белорусиядагы Элчиси Эрмек Ибраимов  Белорус жаштарынын алдында сүйлөп берүү мүмкүнчүлүгү үчүн терең ыраазычылыгын билдирип,  айырмаланган жаштарга белек-бечкектерин тапшырды жана аларга мыкты ийгиликтерди гана каалады.

Алишер ТОКСОНБАЕВ, өз кабарчы