862 Бардыгы /

ПАРИЖ. Франциянын Тышкы иштер министрлигинде Кыргыз Республикасынын Тышкы иштер министри Чыңгыз Айдарбеков  Франциянын Тышкы иштер министрлигинин Мамлекеттик катчысы Жан-Батист Лемуан менен жолугушту.

Тараптар Лемуан мырзанын 2019-жылдын апрелинде Кыргызстанга болгон сапарынын жыйынтыктары боюнча макулдашуулардын ишке ашырылуусунун жүрүшүн, мунун ичинде эки өлкөнүн ишкер чөйрөлөрүнүн ортосундагы байланыштарды мындан ары кеңейтүү, Париж климаттык макулдашуусунун алкагында кызматташуу жана Европа Биримдиги – Кыргыз Республикасы форматындагы өз ара аракеттенүү маселелерин кенен-чонон талкуулашты. Климаттын өзгөрүүсү боюнча дүйнөлүк жараяндарга Франциянын салымы үчүн Кыргыз Республикасынын Тышкы иштер министрлигинин жетекчиси маектешине терең ыраазычылыгын дагы билдирди жана 2019-жылдын 12-ноябрында Кыргыз Президенти Сооронбай Жээнбеков «2015-жылдын 12-декабрында Париж шаарында кол коюлган Климаттын өзгөрүүсү жөнүндө Бириккен Улуттар Уюмунун Алкактык конвенциясы боюнча Париж макулдашуусун ратификациялоо тууралуу» мыйзамга кол койгондугун маалымдады. Андан ары 2020-жылы Кыргызстанда Борбор Азия – Европа Биримдиги  биринчи экономикалык Форумун өткөрүү пландалып жаткандыгын  маалымдады жана Франциянын расмий өкүлдөрү менен ишкер чөйрөлөрүнүн  бул Форумга катышуусуна кызыкдарлыгын жашырган жок.

Ал эми Франциянын Тышкы иштер министрлигинин Мамлекеттик катчысы Жан-Батист Лемуан эки парламенттик демократиянын кызматташуусун тереңдетүүнүн абдан маанилүүлүгүн баса белгилеп, экономикалык жана инвестициялык ишмердүүлүктү жигердетүү үчүн учурдагы дараметти баса белгиледи.

Соңунда Франция+БА тышкы иштер министрлеринин деңгээлинде үзгүлтүксүз өтүп туруучу жолугушууларды уюштурууга Кыргыз тарабы кызыгуусун дагы кошо билдирди. Тараптардын пикиринде мындай жолугушуулар эки тараптуу дагы, аймактык форматта дагы өз ара тыгыз кызматташууга кошумча импульс жаратат.

Алишер ТОКСОНБАЕВ, өз кабарчы