584 Бардыгы /

Дүйнөлүк Банк 2020-жылы Тажикстанда экономикалык өсүш солгундай турганын божомолдоду. Ошол эле маалда каржы институту быйыл бул өлкөдө ИДП 7,2% өсө турганын белгиледи.

Баяндамада 2020-2021-жылдары Тажикстанда ИДПнын реалдуу өсүшү солгундай турганы айтылат. Дүйнөлүк банктын адистеринин пикиринде, бул Орусиядагы экономикалык жагдайларга жана дүйнөлүк рынокто сырьего болгон баанын төмөндөшүнө байланыштуу. Тажикстан экономикасы Орусиядан өтө көз каранды – ал жакта бир миллиондой тажикстандык мигрант иштейт жана өлкөсүнө акча жөнөтүп турат.

Орусия Борбордук банкынын маалыматына караганда, 2018-жылы тажикстандык жеке жактар жөнөткөн каражаттын көлөмү 2,5 миллиард долларды, 2019-жылдын биринчи жарымында 1,1 миллиард долларды түзгөн. Бул 2013-жылга салыштырмалуу эки эсеге аз.

Дүйнөлүк Банк жакынкы эки жылда Орусиядан акча которуу көлөмү азая турганын божомолдоодо. Ошол эле маалда баалуу металлдарды казуу, курулуш жана өнөр жай экономиканын өнүгүшүнө өз салымын кошорун да четке какпайт.

Тажикстан өкмөтү алдыдагы үч жылда тыштан 1 миллиард долларга тете насыя алууга ниеттенүүдө.

www.