678 Бардыгы /

5-декабрда Душанбедеги Жаштар театрында белгилүү түрк драматургу Тунжер Дүженоглунун «Көчкү» пьесасынын негизинде коюлган ташкенттик режиссер Алимжон Салимовдун спектаклинин премьерасы болду.

Пьесада көчкүдөн коркуп тогуз ай бою дабыш чыгарбай жашаган бир уруу элдин турмушу чагылдырылган. Айылда тартиптин сакталышына катуу көзөмөл кылып турган Аксакалдар кеңешинин уруксатысыз жаштар никеге турбайт. Эгерде үйлөнүп алышса, анда аларга биринчи нике түнүн ымыркайдын төрөлүшү жайкы үч айга туура келгендей кылып, аныктап беришет. Бирок коопсуз мезгилге бир нече күн калганда келиндердин биринин толгоосу башталат. Бул Аксакалдар кеңешине билинип калып, алар келинди тирүүлөй көмүү буйругун чыгарышат. Бирок күйөөсү келинчегин жасоолдорго бербей, аларга мылтык кезейт. Келин төрөйт. Мылтык да атылат. Бирок көчкү жүрбөйт. Бул окуядан кийин көчкү коркунучу жок экени, алар жөн гана коркуп жүрүшкөнү белгилүү болот.

«Көчкү» спектакли 2004-жылдан бери дүйнөнүн 40тан ашык өлкөсүндө коюлган.

Бул Алимжон Салимовдун Тажикстанга алгачкы жолу спектакль коюп келиши эмес. Буга чейин ал «Афандинин беш аялы», «Тартюф» жана «Ташкентке саякат» пьесаларынын негизинде даярдаган спектаклдерин коюп кеткен.

Алимжон Салимов 2017-жылы Өзбекстанда «Мыкты театр режиссеру» номинациясында сыйлыкка ээ болгон.

www.