2,395 Бардыгы /

Бүгүн, 13-декабрь Жалал-Абадда “Жаштар экстремизмге жана терроризмге каршы” аттуу форум болуп өттү.

Форумга Жалал-Абад ОИИБинин жетекчиси Кылычбек Жолдошев, Өкмөттүн Жалал-Абаддагы өкүлүнүн орун басары Мамасалы Акматов, аксакалдар кеңеши, аялдар, жаштар комитеттери, казыяттын өкүлдөрү жана студенттер катышты.

Анда экстремизм, терроризм жана радикализмдин түшүнүктөрү боюнча маалымат берилди. Сирияга алданып барып кайра келгендер тууралуу видеороликтер көрсөтүлдү. Баяндамаларда айтылгандай бул өтө кооптуу тобокел экени айтылып, жаштарды андан алыс болууга үндөштү.

“Биздин максат жаштарга ушул теманын актуалдуулугун, мамлекетибиздеги эң көйгөйлүү маселе экендигин жеткирүү  болуп саналат. Белгилүү болгондой 2012-жылдан баштап Сирия маселеси өтө өрчүп кеткен. Андан бери биздин өлкөдөн көп жарандар ошол жакка кетип, согушка катышып, адашкандар көп болгон. Сирия азыркы учурда басаңдап, согуш оту дагы өчө баштады. Бирок жаштар башка жактарга кетип калбасын, террористтик-экстремисттик уюмдарга кирип кетпесин деген ойдо бул боюнча ишти күчөтүүдөбүз”,-дейт К.Жолдошев.

“Жаштар экстремизмге жана терроризмге каршы” деген аталыштагы  форуму Жалал-Абад ОИИБдин демилгеси, ички иштер министрлигинин колдоосу менен өттү.

Кошумчалай кетсек, Жалал-Абад областынан 117 адам Сирияга кеткен. Бүгүнкү күндө 20га жакын жаран  кайтып келип, кылмыш жоопкерчилигине тартылып, учурда абакта олтурушат. 3 жаран кылмыш жоопкерчилигин өтөп, ушул тапта област аймагында жашап жатышат.

Акылай КАРАБАЕВА, “Аймак”