1,348 Бардыгы /

Жалал-Абад шаарындагы Барпы атындагы кыргыз драма театрынын көркөм кеңешинде 2020-жылга карата коюлуучу спектаклдер сунушталды.

Анда көркөм кеңештин мүчөлөрүнүн колдоосу менен жазуучу-драматург Ооганбек Станбековдун коомдук-саясий ишмер маркум Бекмамат Осмоновдун жаркын элесине арналып жазылган “Карыянын ыйы” тарыхый дарамасы жана миграттардын тагдыры туурасындагы “Ата, качан келесиң?” психологиялык драмасы көркөм кеңештин чечеми менен 2020-жылдын I-II кварталында коюла турган болду.

Бул тууралуу жазуучу -драматург Ооганбек Станбеков төмөнкүлөрдү билдирди:

“Маркум Бекмамат Осмонов улуттук лидер катары таанылганда 52 жаш курагында дүйнө салды. Эл сүймөнчүлүгүнө ээ болгон агабыз Жалал-Абад облусунун алгачкы губернатору, КР ЖКнын легендарлуу парламентинин депутаты болгон эле. Турпаты, жан дүйнөсү, мекенчилдиги менен башка ишмерлерден айырмаланып турчу. Ал улуу инсан тууралуу көптөгөн чыгармалар, видео тасмалар жаралды. Анын образын театр искусствосу менен тирүү көрсөтүү (ролун аткаруу) үчүн далалат жасадым. “Карыянын ыйы” тарыхый драмасы буйруса 2020-жылы улуу инсаныбыздын образын жаратуучу ким болору жалпы журтубузду кызыктырат деген ойдомун“,-дейт О.Станбеков.

Ал эми “Ата, качан келесиң?” психологиялык драманын өзөгүндө адам тагдыры, коомдогу саясий тирештер чагылдырылат.

“Аймак”