564 Бардыгы /

Жекшемби күнү Ирандын баш калаасы Тегеран шаарында өкмөткө каршы нааразылык акциялар уланды. Көчөгө чыккандардын негизги талабы — украиналык «Боинг» учагын атып түшүрүүгө күнөөлүү адамдарды жазалоо.

Күбөлөрдүн айтымында, 12-январдагы акцияга ишемби күндөгүгө караганда кыйла аз адам катышты. «Твиттер» социалдык түйүнүнүн колдонуучулары Шахид Бехешти жана Аллам Табатабаи атындагы университеттердин алдында өткөн акциялардын видеосу менен сүрөттөрүн жайгаштырышууда.

Иранда нааразылык акциялар расмий Тегеран өз аймагында кулаган украиналык учакты капысынан атып түшүргөнүн мойнуна алгандан кийин башталган.

Алгач Ирандын бийлиги бортунда 176 киши бар украиналык «Боингдин» кулашын техникалык мүчүлүштүктөр менен түшүндүрүп жаткан. Бирок 11-январда Тегеран учакты «адамдын жаңылыштыгынан» улам өлкөдөгү Ислам революциясынын сакчылар корпусунун аскерлери атып алганын моюнга алган. Ошол эле күнү Тегеранда акцияга чыккан айрым адамдар АКШнын соккусунан набыт болгон таасирдүү генерал Касем Сулейманинин сүрөтүн айрышкан.

АКШнын президенти Дональд Трамп «Твиттердеги» баракчасы аркылуу нааразылык акциянын катышуучуларын колдоп, иран бийлигин аларга карата күч колдонбоого чакырган.

www.