1,475 Бардыгы /

БИШКЕК. Президент Сооронбай Жээнбеков Кыргыз Республикасынын Куралдуу күчтөрүнүн Башкы штабынын жетекчиси Райымберди Дүйшембиевди кабыл алды. Сүйлөшүү маалында Куралдуу күчтөрдү модернизациялоо, алардын аскерий дараметин жогорулатуу чаралары, өлкөнүн коргонуу жөндөмүн мындан ары бекемдөө артыкчылыктары катуу талкууланды.

Куралдуу күчтөрдүн Башкы штабынын жетекчиси Райымберди Дүйшембиев 2019-жылдагы иштердин жыйынтыктары жана 2020-жылга карата биринчи даражадагы милдеттер туурасында баян этти. Жакынкы өнөктөш өлкөлөр менен аскерий жана аскерий-техникалык жаатта активдүү алака жүрүп жаткандыгы жана Куралдуу күчтөрдү башкаруу системасын өркүндөтүү боюнча алгылыктуу иштер аткарылып жаткандыгы белгиленди. «Санарип Кыргызстан» Концепциясын ишке ашыруу алкагында «Түндүк» ведомстволор аралык электрондук өз ара аракеттенүү түйүнүнө кошулган. Райымберди Дүйшембиев ошондой эле Кыргызстандын аймагына жаңы коронавирусту киргизбөө максатында өлкөнүн көзөмөлдөө-өткөрүү бекеттеринде Саламаттыкты сактоо министрлигинин жана башка тиешелүү мамлекеттик органдардын өкүлдөрү менен тыгыз байланышта иштер жүрүп жаткандыгын дагы  кошумчалады.

Мамлекет башчысы Аскерий адистердин даярдыгынын сапатын жакшыртуу, аскердик тартипти жогорулатуу жана Куралдуу күчтөрдүн жеке түзүмүндө укук бузуулардын алдын алуу боюнча комплекстүү чараларды көрүүүнү катуу тапшырды. Кыргыз Республикасынын Коопсуздук Кеңешинин акыркы жыйынында санариптештирүү маселеси негизги маселелердин бири болгондугун өзгөчө белгиледи. Маалыматтык коопсуздукту жана аскерий түзүмдөрдүн ишмердүүлүгүнүн ыкчамдыгын жогорулатуу максатында өлкөнүн Куралдуу күчтөрүн санариптештирүүн мындан ары дагы улантуу зарылдыгына токтолду.

Алишер ТОКСОНБАЕВ, өз кабарчы