2,210 Бардыгы /

Көк-Жаңгак шаардык борборлоштурулган китепканасы 1934-жылы негизделген. 1977-жылдан бери борбордук китепкана аталып, шаардын калкын тейлеп келет. Ал балдар үчүн 24 980 жана чоңдор үчүн 43 351 китеп фонду менен эки бөлүмдөн турат. Эки бөлүмдүн 2019-жылга карата катталган окурмандарынын саны  4189ду түзгөн. Анда учурда 8 китепканачы, 2 кароолчу, 1 жууп тазалоочу, 1 реставратор эмгектенип келет. Бирок китепкана имаратынын эскилиги жетип, китептерди жаңыртуу муктаждыгы бар. Анда аталган китепкана тууралуу төмөндө сөз кылабыз.

Бурулкан ИСМАИЛОВА, Көк-Жаңгак шаардык борборлоштурулган китепкананын жетекчиси:

“МАСЕЛЕБИЗ ИМАРАТТЫН ЭСКИЛИГИНДЕ БОЛУУДА”

-Китепкана жергиликтүү бюджетке карагандыктан оңдоо-түзөө иштерине, керектүү буюм-тайымдарга каражат бөлүшөт. Өтө эле жетишип кетпесе да колдоо көрсөтүп, каралашып турушат. Биздин бирден-бир маселебиз китепкананын имаратынын эскилиги жеткендигинде болууда. Анын эски экендигине карабай оңдоп, иштеп келүүдөбүз. Кыш мезгилинде жергиликтүү бюджет эсебинен жылына 10 тонна көмүр түшүрүп беришет. Контрамарка мештерине от жагып жылытуунун айласын кылабыз, бирок бары бир толук ысыбайт. Кээде электрондук жылыткычтарды да жакканы туура келет. Азыр окуу залы жана бир эки кабинетибиз жылуу, андан сырткары балдар бөлүмү дагы суук болгондуктан ал жактагылар бул жерде иштеп жатышат. Жаңы имарат болсо, ушул китепканабыз жаңыланса, окурмандарга жагымдуу шарттар түзүлсө дейбиз. 

Маданият, маалымат жана туризм министрлиги тарабынан 2009-жылы чатыры жабылган болчу. Ага чейин да шыптардан аябай суу өтүп, андан да кыйналат элек. Китептер суу болбосун деп үстүн жаап, ар нерсе кылчу элек. Чатыры жабылган соң деле кандайдыр бир жерден суу өтө берип, балдар китепканасынын бөлмөсү кулап калган. Аны кармап калганга деле мүмкүнчүлүк болбоду. Андан кийин балдар китепканасы 2014-жылдары маданият үйүнүн бир бурчуна көчүрүлгөн. Ал жакта деле жакшы шарттын жоктугуна байланыштуу косметикалык оңдоодон өткөрдүк. Санариптешүү, автоматташыруу деп март айында китептердин инвентаризация боюнча текшерүү  болот. Ага ар бир китепкана жок дегенде 100 китепти сканерден өткөрүп, электрондук форматын түзүү керек. Бирок техникалык жабдыктардан бир аз аксап калуудабыз, себеби бизде эки компьютер болгону менен сканерлөөдө да бир китепти бир күндө бүтө албай кыйналабыз. Учурда техникалык жактан жабдууларды жана заманбап эмеректерди алуу муктаждыгы да бар. 

Чоңдор жана балдар үчүн бардыгы болуп 68 331 китеп бар. Ар тармактуу китептер болгону менен кыргыз тилиндеги китептер аз. Эл аралык уюмдардан долбоор аркылуу басмаканалардан китепканага жаңы китептер келүүдө. 1968-жылдан бери чыккан китептер жарактуу болуп, андан мурункуларды эсептен чыгарышыбыз керек. Бирок жетиштүү жаңы китеп жок болгондугу жана китеп коллекторлору бизге китеп алып келбегендигине байланыштуу фондду жоготуп алабыз деп кармап турабыз. Мектептерден көбүнчө мурунку китептерди сурап келгендер болуп калат. Андан сырткары китептердин электрондук варианттарын дагы сактап койгонбуз. Окурманга китепти сөзсүз таап бергенге жана сапаттуу тейлегенге аракет кылуудабыз. Аны тартуу үчүн иш-чараларды уюштуруп, маалыматтарды таркатып турабыз. Ал эми өткөн жылы китепканабыздын 85 жылдык мааракесин өткөрдүк. 

Акылай КАРАБАЕВА, “Аймак”