2,959 Бардыгы /

Кыргызстанда сел жана суу ташкыны жаз айларында башталып, анын эң көп катталуусу июль-август айларында туш келет. Мындай өзгөчө кырдаал сентябрь айынын аягына чейин созулат.

Селдин жүрүшүнө түрткү берген себептер: узакка созулган, нөшөрлөп жааган жамгыр; күндүн кескин ысып кетиши; кардын же мөңгүлөрдүн интенсивдүү ээриши; жер титиреп, жанар тоолордун жарылышы; токойлордун кыркылышы; казуу иштерин туура эмес уюштурулушу.

Башка агымдардан айырмаланып, сел өз-өзүнчө толкундар менен коштолот. Биринчи толкун 15 метрге чейин же андан жогору бийиктикте болушу мүмкүн. Ар кандай аралаш массаны өзү менен кошо ширеп, саатына 15-20 км аралыкты басып өткөн катуу сел кыйраткыч күчкө ээ болуп, айдоо аянттарын жок кылып, адамдардын жана мал жандыктардын өлүмүнө алып келиши ыктымал. Мына ошондуктан, селди «ырайымсыз тоо ажыдаары» деп атап келишет.

2020-жылдын 19-апрелинен баштап Жалал-Абад шаарынын аймагындагы сел  каналдарды техника менен тазалоо иштери башталды. Тазалоо иштери шаардык коммуналдык чарба жана көрктөндүрүү департаменти тарабынан жүргүзүлүүдө.

Маалымат үчүн 2020-жылдын жаз айында шаардын аймагындагы Хан-Арык сел каналынын 500 м, Чөкө-Арык сел каналынын 400 м, Сел-Арык сел каналынын 1500 м өлчөмүндөгү толуп калган бөлүктөрү техника менен тазаланууга тийиш. Техника бара албаган жерлери кол менен тазаланат.

Аталган жумуштардын сапаттуу аткарылышына Жалал-Абад шаары боюнча өзгөчө кырдаалдар бөлүмү көзөмөл жүргүзүүдө.

Жалал-Абад шаары боюнча ӨКБнүн

Жарандык коргонуу бөлүмчөсүнүн башчысы майор А.Абдуллаев