988 Бардыгы /

Казакстан парламентинин сенаты 30-апрелде «Тынч жыйындар жөнүндө» мыйзам долбоорун биринчи окууда жактырды. Мыйзам долбооруна добуш берүүгө катышкан 47 депутаттын баары макулдугун билдирди.

Укук коргоочулардан жана өкмөттүк эмес уюмдардан куралган “Жарандык тилектештик” платформасы буга чейин казак бийлигине кайрылып, чала иштелип чыккан мыйзамды кабыл албоого чакырган. Кайрылууда документ жапырт жыйындарга жана каршылык акцияларына тыюу салынып, коронавирус пандемиясына байланыштуу өзгөчө абал өкүм сүрүп жаткан маалда кабыл алынып жатканы белгиленген.

Укук коргоочулар тынч жыйындар тууралуу мыйзам долбоорун Бириккен Улуттар Уюму (БУУ) менен Европадагы Коопсуздук жана Кызматташтык уюмуна (ЕККУ) экспертизага жөнөтүүгө чакырышкан.

Сенат мыйзам долбоорун бүгүн, 30-апрель күнү кечинде экинчи окууда карай турганы күтүлүүдө. Регламент боюнча документ экинчи окууда колдоо тапса, парламент тарабынан кабыл алынган болуп эсептелет жана кол коюу үчүн президентке жөнөтүлөт.

Касым-Жомарт Токаев былтыр жайында президент болуп шайлангандан бери тынч жыйындар тууралуу мыйзамды жакшыртуу тууралуу бир канча жолу убада берген. Ал ”митинг өткөрүү маданиятын коомчулуктун аң-сезимине сиңирүүгө мезгил жетти” деп айткан.

Азыркы мыйзам боюнча казакстандыктар массалык иш-чараларды өткөрүү үчүн жергиликтүү бийликтен уруксат алышы керек. Бирок бийлик ар түрдүү шылтоолор менен митингдерди өткөрүүгө тыюу салып келет.

WWW.