2,527 Бардыгы /

“Өнүгүү-Прогресс” саясий партиясы Кара-Кулжа районундагы Мамытбек Жунусов атындагы аймактык оорукананын бир бөлмөсүн заман талабына жараша жасалгалап берди. Бул тууралуу аталган партиянын басма сөз кызматы билдирди.
Алынган маалыматка караганда, партиянын программасындагы алты багытынын бир багыты саламаттык сактоо тармагын өнүктүрүүгө арналган жана ушул программанын алкагында Мамытбек Жунусов атындагы аймактык ооруканасынын неврология бөлүмүнүн бир бөлмөсү заманбап жабдуулар менен жасалгаланып берилген. Кара-Кулжа районунун Буйга айылынын 76 жаштагы тургуну Маматмуса Кенжебаевдин айтымында, ооруканага мындай жакшы шарттын түзүлүшү бейтаптын тез аранын ичинде айыгып кетүүсүнө да өбөлгө түзөт.
-Бул бөлүмдө 31 оорулууга орундуктар түзүлүп, бейтаптарды дарылоо иштерин 15 өмүр сакчысы жүргүзөт, – дейт неврология бөлүмүнүн башчысы Асаналы Көчкөнбаев. Дарыгердин билдирүүсүнө ылайык, партиянын мындай аракетинен башка партиялар дагы үлгү алып, оор абалда турган саламаттык сактоо тармагына колдоо көрсөтсө, улуттун ден-соолугуна кам көрүшкөн болоор эле.
Ал эми партиянын өкүлү Нурмамат Муллакелдиевдин айтымында, бул саамалыктардын биринчиси эмес, мындай жардам буга чейин эле республиканын аймагында жыйырмага жакын район-шаарлардын ооруканаларына берилген. Айрыкча, калкы борбордук ооруканаларга баруу мүмкүнчүлүгү аз тоолуу аймактар тандалып алынган. Ошондой эле жакын арада курамы улуттук кардиология жана терапия институтунун дарыгерлеринен турган медициналык көчмө топ аркылуу айыл жерлеринде жашаган бейтаптарды акысыз текшерүү иш-чарасы да жүргүзүлөт.

Орозалы Карасартов, “Аймак”