720 Бардыгы /

ОШ. Ош облусундагы Кең-Сай конушуна 10 миллион сомдук эки трансформатордун баасын жогорулатып, 82,6 миллион сомго алынган коррупциялык фактыны Каржы полициясы эми гана таап, кенен-чонон иликтеп жатат.

Чындап эсептегенде, эки трансформатор өз наркынан сегиз эсеге кымбаттатылган. Каржы полициясынын Ош шаардык башкармалыгы иштин көлөмүн атайылап көбөйтүп жана мамлекеттик бюджеттин акчасын өз чөнтөгүнө салып алуу фактысын сотко чейинки өндүрүш менен иликтеп жатканы маалымдалды.Баса, эки трансформатордун баасы дээрлик сегиз эсе жасалма кымбат көрсөтүлүп, мунун кесепетинен мамлекет тарткан чыгымдын баасы 73,4 миллион сомду түзүп олтурат.

         Баса, Ош облусунун Капиталдык курулуш боюнча башкармалыгы менен “Э” деп аталган ачык типтеги акционердик коому (Каржы полициясы ишкананын атын так айткан жок) Оштогу Кең-Сай жаңы конушун электр менен камсыздай турган жалпы наркы 200 миллион сомдук курулуш иштерин аткарууга келишим түзгөн. Ал эми башкы подрядчы болгон ачык типтеги акционердик коом келишимдин негизинде субподрядчы катары “С.Т.” аталышындагы ЖЧК менен дароо макулдашат. Анда айтылган ЖЧК электр жабдууларды алып келүү жана жалпы курулуш иштерин жасоо милдетин мойнуна алган. Андан айтылган ЖЧК 82,6 миллион сомго эки даана трансформатор алып келген. Маалыматта анын өзүнүн накта баасы 10 миллион сом тургандыгы айтылды.

– Ошентип, эки трансформатордун баасы дээрлик сегиз эсе кымбат көрсөтүлүп, мунун кесепетинен мамлекет тарткан чыгымдын баасы 73,4 миллион сомду түздү. Эске сала кетсек, ушуга окшогон дагы бир факты боюнча аталган ЖЧКнын жетекчиси П.Т. кармалып, убактылуу тергөө абагына киргизилген эле, — деп кошумчалады Каржы полициясынын Оштогу өкүлү.

Айтмакчы, дал ушул Кең-Сай жаңы конушуна кетчү жолго бөлүнгөн 42,9 миллион сомго ишти аягына чейин бүтүрбөй койгон факты туурасында дагы Каржы полициясы мындан эки күн мурда эле билдирген. Ушул тапта аталган обьект пайдаланууга берилбей, ал эми аткарылбай калган жумуштун жалпы чыгымы он миллион сомдон ашты.

Алишер ТОКСОНБАЕВ “АЙМАК”