2,163 Бардыгы /

ОШ. Кара-Суу райондук прокуратурасы Ош облусуна караштуу Кара-Суу районунун Киров айылындагы 720 орундуу мектептин курулушун текшерүүдө мамлекетке 24 миллион 209 миң 093,86 сомдук зыян келтирилгендигин тастыктады.

Башкы прокуратурадан маалымдашкандай, аталган мектептин курулушу «Акмат Курулуш» жоопкерчилиги чектелген коомуна тапшырылып, 159 005 463 сомго келишим дагы түзүлгөн. Имарат пайдаланууга 2019-жылдын 5-сентябрында атыпшыралган. Бирок райондук прокуратура аныктагандай, Сарай айыл өкмөтүнүн жана «Акмат Курулуш» ЖЧКнын кызмат адамдары мектептин курулушу боюнча аткарылган жумуштардын актыларына жалган маалыматтарды киргизишип,  айрым жумуштарды жогорулатылган баада, иш жүзүндө аткарылбаган жумуштарды аткарылды деп, ошондой эле айрым аткарылган иштерди кайталап киргизишкен.

Ошентип, бул факты Жазык кодексинин 320-беренесинде («Кызмат абалынан кыянаттык менен пайдалануу») көрсөтүлгөн кылмыштын белгилери менен райондук прокуратуранын бирдиктүү реестрине катталып, сотко чейинки өндүрүш башталды.

Алишер ТОКСОНБАЕВ “АЙМАК”