2,394 Бардыгы /

БАТКЕН. Кыргыз Өкмөтүнүн Баткен облусундагы ыйгарым укуктуу өкүлү Жаныбек Жалалов Баткен жергесинде кен казуу ишканаларынын ал-акыбалын жана бул тармактагы салык маселесин караган жыйынга катышты.

Ушул тапта Баткен облусунда кен-байлыктарды иштетүүгө жергиликтүү жана тыштан келишкен ишкерлерге 337 лицензия берилген. Мунун ичинен кендерди изилдөөгө – 46, чалгындоо иштерин жүргүзүүгө – 113, кендерди иштетүүгө – 178 лицензия таратылган. Маселен, көмүр кендерин иштетүүгө берилген 88 лицензиянын 45и гана натыйжа бергенге жарады. Ушундан улам Кыргыз Өкмөтүнүн Баткен облусундагы ыйгарым укуктуу өкүлү Жаныбек Жалаловдун айтымында, лицензия ээлеринин басымдуулугу аны туура жана максаттуу пайдаланышпай, ээлеп алып ишмердүүлүгүн жүргүзбөй келишет. Ошондуктан, облус башчысы алардын материалдык-техникалык базасы, айлантма каражаты, тоо-кен тармагы боюнча билими, тажрыйбасы барбы, жокпу дагы аныктап, лицензиялардын мыйзамдуулугуна, максаттуулугуна үзгүлтүксүз мониторинг жүргүзүүнү тийиштүү жетекчилерге кабдан атуу тапшырды. Ошондой эле жер астындагы кендер –  мамлекеттин байлыгы, ар кандай жолдор менен арзыбаган каражатка лицензия алып, миңдеген тонна кен казып алып, бирок кирешесин жашырып, салык төлөөдөн качкан ишкерлер  менен туруктуу иш алып баруу, көмүскөдө эмес, мыйзамдуу иштөө менен гана мамлекетке тийиштүү салыкты өз убагында төлөө боюнча түшүндүрүү иштерин дагы күчөтүүнү эскертти.

Кыргыз Өкмөтүнүн Баткен облусундагы ыйгарым укуктуу өкүлү Жаныбек Жалалов жергиликтүү жетекчилерге ачык кайрылды: – Буга чейин биздин аймакта бир катар инвесторлор кен-байлыктарды издөө, чалгындоо жумуштарын жүргүзүп, бирок, жергиликтүү тургандар менен адамча мамиле түзө албагандыктан, калк арасында нааразычылыктар жаралып, кооптуу чөйрө түзүлгөндүгү дагы баарызга маалым. Мындан улам аймактын өнүгүүсү, элдин бакубат жашоосу үчүн кен-байлыктарды толук кандуу иштетүүгө убакыт жетти. Бул өңүттө алгылыктуу кадамдарды жасап, лицензия ээлери жана жергиликтүү тургундар менен бетме-бет сүйлөшүүлөрдү жүргүзүү абзел!

Белгилей кетчү жагдай: өткөн жылдын жыйынтыгы менен Баткен облусунда пайдалуу кендерди казуу менен өнөр жайында продукция өндүрүүнүн  көлөмү 821,5 миллион сомду, же болбосо облуста өндүрүлгөн өнөр жай продукциясынын көлөмүнүн  26,7 пайызын түздү.

Алишер ТОКСОНБАЕВ, өз кабарчы