1,029 Бардыгы /

БАТКЕН. Баткен облусунда АРИС тарабынан ишке ашып жаткан “CASA-1000 жергиликтүү коомчулуктарды колдоо” жана “ Жылуулук менен камсыздоону жакшыртуу” долбоорлорунун  максаттары, милдеттери жана ишке ашыруу механизмдери менен тааныштыруу үчүн тегерек үстөл өткөрүлдү.

Кыргыз Өкмөтү менен Дүйнөлүк Банктын ортосунда “CASA-1000 жергиликтүү коомчулуктарды колдоо” долбоору үчүн 21,0 миллион АКШ доллар өлчөмүндө кошумча каржылоо жөнүндө макулдашылган. Мунун алкагында алдыда Баткен облусунда он тогуз айыл социалдык муктаждыктарын жеңилдетүү үчүн кошумча каржыланат. Долбоор экономикалык мүмкүнчүлүктөрдү жакшыртууга жана айылдарда алгачкы медициналык жардамдын жеткиликтүүлүгүн жакшыртууга гана багытталган. Ошондой эле калктын эң аярлуу катмарынын мүмкүнчүлүктөрүн ого бетер кеңейтет.

COVID-19 пандемиясынын кесепетинен пайда болгон тобокелдикти азайтууда, айылдын инфратүзүмдөрүнүн жакшыртууга  жардам берет. Мисалы, биринчи медициналык жардам көрсөтүү бекеттерине, же  суу менен камсыз кылуу, санитария жана гигиена менен байланышкан  муктаждыктар жөнгө салынат. Буга кошумча айыл чарба өндүрүшү жана кайра иштетүү, транспорттук кызмат көрсөтүүлөр, элдик чеберчилик жана тигүү буюмдарын өндүрүү, санариптештирүү жаатына жаштар жана аялдарга колдоолор көрсөтүлөт. Каржылоонун натыйжасында тандалган ар бир Айыл Өкмөткө берилүүчү ар бир субгрант орточо  100 миң АКШ долларын чапчыйт. Ал эми “Жылуулук менен камсыздоону жакшыртуу” долбоорунун максаты тандалып алынган билим берүү, саламаттык сактоо жана башка коомдук имараттардын энергетикалык натыйжалуулугун жогорулатуу болуп саналат. Угул тапта Баткен облусундагы он эки Айыл Өкмөтүндө тандалган имараттарды жылуулук менен камсыздоону жакшыртуу аракеттери көрүлүүдө.

Ошентип, аталган тегерек үстөлгө катышкан Кыргыз Өкмөтүнүн Баткен облусундагы ыйгарым укуктуу Өкүлүнүн биринчи орун басары Жаркынбек Максүтов аталган долбоорлордун облустун социалдык муктаждыктарын жеңилдетүүдө жана элдин жашоо-шартын заман талабына жараша жакшыртууда мааниси зор экенлигин баса белгилеп, жергиликтүү бийлик органдарына жана тийиштүү мамлекеттик мекеме жетекчилерине АРИС менен биргеликте тыгыз иш алып баруу менен, долбоорду ийгиликтүү ишке ашырууну катуу тапшырды.

Алишер ТОКСОНБАЕВ “АЙМАК”