1,008 Бардыгы /

 БАТКЕН. “Санарип Кыргызстан 2019-2023” санариптик трансформациялоо концепциясын жүзөгө ашыруу алкагында Баткен облусундагы 233 мектептин ичинен 228 мектеп интернет менен камсыз этилди.

         Ушул тапта Кадамжай районундагы үч  мектеп оптика-волокондук кабель аркылуу интернет менен камсыздоо иштери жүрүп жатат. Бул жумуштар аткарылса, облустагы мектептер 100 пайыз интернет менен камсыздалат.  Ал эми техникалык себептерге байланыштуу интернет байланышына туташтыруу мүмкүнчүлүгү жок, эң алыскы айылдардагы  дагы эки мектеп бар. Алар Кадамжай районундагы Көтөрмө Айыл Өкмөтүндөгү  Кара-Шоро башталгыч мектеби, Баткен районундагы Кара-Бак Айыл Өкмөтүндөгү  Зардалы айылындагы Н.Сүйүнов атындагы башталгыч мектеби. Белгилей кетсек,  билим берүү тармагын санариптештирүү алкагында, билим сапатын жогорулатуу, ата-эне менен баланын, мектептин ортосунда байланышын чындоо максатында “Дисковери” билим берүү мекемеси, “Медас холдинг” аркылуу EduPage, E-kundoluk программаларын колдонушуп, электрондук күндөлүк, электрондук журнал менен 166 мектеп иш алып барууда. 

         Баткен облусунун аймагындагы мектептерде 145 интерактивдүү доска орнотулган. 2020-жылда 22 мектепте электрондук китепкана орнотулду. Балдардын коопсуздугун камсыздоо максатында 168 мектепте видеокөзөмөл камералары орнотулган. Аймакта жалпысынан үч мектеп инновациялык мектептердин катарына кирип, иш алып барууда.  Облустун мектептеринде  2181 компьютер бар.

Алишер ТОКСОНБАЕВ “АЙМАК”