798 Бардыгы /

Жалал-Абад облусунун аймагында милициянын участкалык инспекторлорунун 2020-жылы аткарган жумуштары жергиликтүү тургундардын талкуусуна коюлуп жатат.

Бул жолку элдик жыйын Сузак районунун аймагында улантылды. Барпы айыл аймагында болгон жыйынга Жалал-Абад ОИИБдин начальнигинин милдетин аткаруучу, милициянын полковниги Нурбек Сыдыков катышып, жергиликтүү калктын суроо-сунуштарын угуп, жакынкы аралыкта чечүү тапшырмаларын койду.Элдик жыйындын жүрүшүндө Барпы айыл аймагын тейлеген участкалык инспекторлордун жана жашы жете электер менен иштөө инспекциясынын кызматкерлеринин жылдык аткарган жумуштары тууралуу маалыматтар берилди. Жыл ичинде кетирилген кемчиликтер белгиленип, аларды кыска мөөнөттө жоюу тапшырмалары Сузак РИИБдин жетекчилигине коюлду.Жыйын соңунда аксакалдар ак баталарын беришип, элибизде тынчтык өкүм сүрүп, бакубат турмушта жашап, милициянын  ишинде ийгиликтер болуусун каалап өтүштү.

Күндүн экинчи бөлүгүндө Сузак айыл аймагын тейлеген кызматкерлердин жыл ичинде аткарган жумуштары жергиликтүү тургундардын талкуусуна коюлду. Бул жыйынга Жалал-Абад ОИИБдин начальнигинин сотко чейинки өндүрүш иши боюнча орун басары, милициянын полковниги Алмаз Кудайбердиев катышып, өткөн жыл ичинде ачылбай калган кылмыштардын бетин ачуу, кетирилген кемчиликтерди жоюу талабын койду. Жыйындын катышуучуларынын суроолоруна жооп берип, кылмыштуулуктун алдын алууда кайдыгер карабастан милицияга көмөктөшүүгө чакырды. Элдик жыйын учурунда сөз сүйлөгөн тургундар 2020-жылкы пандемия дал ушул аймактан башталгандыгын, ал учурда милиция кызматкерлери өз өмүрлөрүн, ден соолуктарын тобокелге салып, калктын саламаттыгы үчүн, оорунун жайылуусунун алдын алуу максатында күнү-түнү блокпосттордо тыным албастан кызмат өтөшкөндүгүн белгилешти.

Сузак  айыл аймагында 45 миңден ашуун калк жашайт. Бул аймакты 5  милициянын участкалык инспекторлору жана 4 жашы жете электер менен иштөө инспекциясынын кызматкерлери тейлешет. Алар былтыркы жыл  ичинде 5 кылмыштын бетин ачышып, 10 кылмыштын бетин ачууга көмөк көрсөтүшүп, издөөдө жүргөн 1 кылмышкерди кармашкан.

https://youtu.be/EF43-WWwme8 видео ушул ссылкада.

“АЙМАК”