1,116 Бардыгы /

БАТКЕН. Жаз эрте келген Баткен облусунун Лейлек районунун Кулунду Айыл Өкмөтүнүн аймагына 500 гектар кайрак жерге арпа себилди. Облустун башка аймактарында дагы жер айдоо жумуштары абдан кызуу жүрүп жатат.

Быйыл Баткен облусунда 9247 гектарга жаздык буудай, 11495 гектарга жаздык арпа себүү пландалган. Ошондой эле 1450 гектарга дан буурчак, 432 гектарга май өсүмдүктөрүн эгүү аракеттери көрүлүүдө. Негизи 2021-жылдын түшүмү үчүн жаздык жана күздүк себилүүдө. 30501 гектар жерге кылкандуу дан эгиндерин себүү пландалган. Облуста жаздык айдап-себүүгө айыл чарба техникалары даяр. Күйүүчү жана майлоочу майлар жылдагыдай эле  дыйкандарга мамлекет тарабынан  арзандатылган баада сатуу уюштурулууда. 

         Белгилей кетчү жагдай: Баткен облусунда быйылкы жылдын жазгы талаа жумуштарын өз убагында жана уюшкандыкта өткөрүү максатында Кыргыз Өкмөтүнүн Баткен облусундагы ыйгарым укуктуу Өкүлүнүн атайын буйругу чыгып, таажы илдетине байланыштуу азык-түлүк коопсуздугунун алдын алуу, азык-түлүккө болгон бааларды турукташтыруу максатында  айдоо аянттарын дагы кеңейтүү, негизги керектелүүчү айыл чарба продукцияларын өндүрүү менен көлөмүн өстүрүүнү колго алуу, жер жерлерде дыйкандарга  түшүндүрүү иштерин жүргүзүү боюнча тапшырмалар дагы катуу берилген. Ушул тапта жер семирткичтер жана үрөндөр жергиликтүү базарларда ыңгайлуу баада гана сатылууда.

Алишер ТОКСОНБАЕВ “АЙМАК”