1,458 Бардыгы /

ОШ. Кыргызстандын Түштүк башкалаасынын мэри Таалайбек Сарыбашов Ак-Буура дарыясынын эки жээгин көрктөндүрүү жана жашылдандыруу багытындагы ири долбоордун курулушунан кабар алып, жээктеги мыйзамсыз курулуштарды жок кылуу иш-аракеттерин дыкаат текшерди.

Адегенде Ош шаарынын башчысы Ак-Буура дарыясынын эки жээгин тең бекемдеп, шаар тургундарынын эс алуусуна, коноктор үчүн көрүнүктүү, кооз жерге айландыруу максатында башталган долбоордун курулушу кызуу жүрүп жаткандыгын асыктады.

• 2020-жылдын эң ири долбоорлорунун бири Ак-Буура болуп саналат.

Биринчи этапта Санабар Бахапова көчөсүнөн Базарбай Нурматов көчөсүнө чейинки эки жарым чакырымдан болгон эки жээк бекемделет. Мындан тышкары долбоорго тоскоолдук берген курулуштарды жылдыруу иштери дагы кызуу жүрүп жатат. Баары мыйзам чегинде болот. Шаардыктарга ыңгайлуу шарттарды түзүп берүү максатында бара-бара көп иштер аткарылат, – деди Кыргызстандын Түштүк башкалаасынын мэри Таалайбек Сарыбашов.

Ак-Буура долбоору эки этаптан турат. Биринчи этабында Санабар Бахапова көчөсүнөн Базарбай Нурматов көчөсүнө чейин оңдолсо, экинчи этабында Базарбай Нурматов көчөсүнөн Алишер Навои көчөсүнө дейре оңдоо иштери жүрөт.

Аталган долбоордо Ак-Буура дарыясынын эки жээгин бекемдөө, балдар ойноочу аянтчалар, жөө жана велосипед менен жүрүүчү жолдор, жарыктандыруу, эс алуучу отургучтар жана көпүрөлөр курулат. Мындан тышкары тазалык үчүн урналар дагы кыдырата коюлуп, велопорковкалар курулат. Дарыянын жээктерине коопсуздук үчүн тосмолор деле орнотулмакчы.

Алишер ТОКСОНБАЕВ “АЙМАК”