840 Бардыгы /

БИШКЕК. Америка Кошмо Штаттарынын Кыргызстандагы Элчилигинин Райымбек Матраимовдун Улуттук коопсуздук мамлекеттик комитети тарабынан экинчи ирет кармалышына карата тараткан билдирүүсүнө байланыштуу УКМКнын төрагасы Камчыбек Ташиев акыры үн катты.

– Ооба, Америка Кошмо Штаттары биздеги Элчилиги аркылуу ушундай билдирүүсүн экинчи ирет жар салып олтурат. Албетте, биз укуктуу өлкө болгондуктан, бардык мыйзамсыз аракеттер, коркунучтар, чакырыктар менен күрөш жүргүзүп жатканыбызга АКШ эле эмес, башка дагы өлкөлөрдүн кубатташы жагымдуу көрүнүш жана биз аны туура кабылдайбыз.

Анткен менен АКШ бийлигинин мындай тариздеги билдирүүлөрү сөз жүзүндө гана калып, иш жүзүндө натыйжасыз болуп жатат. Дегеним, эгерде АКШ чындап эле биздин жемкорлук менен күрөшүүдөгү астейдил аракеттерибизди кубаттаса, анда Кыргызстанда оор беренелер менен жемкорлукка айыпталып соттолгон Аскарбек Шадиевди эмнеге бизге дароо өткөрүп бербейт. Тескерисинче, Шадиев бүгүнкү күндө АКШда ээн-эркин жашап, жада калса ишкердик менен алектенип жүргөндүгүн жакшы билебиз. АКШ бул иште чын ниеттен жардам көрсөткүсү келсе, Аскарбек  Шадиевди Кыргызстанга кайтарсын! Эгерду бул кылмышкерди кармап келүүгө шарт түзчө, керек болсо мен өзүм барып, аны кармап алып келүүгө даярмын! Ал эми жемкорлук менен аёосуз күрөшүү биздин ички ишибиз. Буюрса, биз өлкөбүздө адилеттикти жана акыйкаттыкты орнотуунун үстүндө талбастан тынымсыз аракеттерибизди өз алдыбызча күчөтө бермекчибиз! Ошентип,  жакынкы аралыкта биздин өлкөбүздө жана коомубузда жемкорлук, уюшкан кылмыштуулук сыяктуу терс көрүнүштөрдүн тамыры кыркылып, коркунучтуу илдеттердин жок болуп бараткандыгын элибиз сезе баштайт, – деп ишендирди УКМК төрагасы Камчыбек Ташиев.

         Аман турсак, муну дагы көрө жатаарбыз…

Алишер ТОКСОНБАЕВ “АЙМАК”