681 Бардыгы /

МОСКВА. Кыргыз Республикасынын Орусия Федерациясындагы Атайын жана Ыйгарым укуктуу Элчиси Гүлнара-Клара Самат Орусиянын Агартуу министринин биринчи орун басары Дмитрий Глушко менен жолугушту.

Өз ара сүйлөшүүнүн жүрүшүндө Кыргыз Республикасынын Президенти Садыр Жапаровдун ушул жылдын 24-25-февралындагы Орусияга болгон иш-сапарынын жүрүшүндө жетишилген макулдашууларды жүзөгө ашыруу менен байланышкан маселелер, ошондой эле Кыргыз Республикасы менен Орусия Федерациясынын ортосундагы билим берүү жаатындагы кызматташуунун өтө актуалдуу көйгөйлөрү кең-кесири талкууланды. Маселен, Орусиянын Агартуу министри С.Кравцовдун 2021-жылдын март айынын экинчи декадасында Кыргызстанга боло турган иш-сапарынын деталдары, Кыргызстандын аймактарында Орус мектептерин куруу боюнча пландар, республикада «Чет өлкөлөрдөгү орус мугалими» долбоорун андан ары ийгиликтүү ишке ашыруу, Кыргызстандын окуу жайларын окуу куралдар менен толук кандуу камсыздоо көйгөйлөрү дагы кошо айтылды.

Соңунда Кыргыз Республикасынын Орусия Федерациясындагы Атайын жана Ыйгарым укуктуу Элчиси Гүлнара-Клара Самат Кыргыз жарандарын жана Кыргызстандын Орусияда эмгектенип жүрүшкөн мигранттарынын балдарын орто кесиптик билим берүү мекемелеринде окутууга көмөк көрсөтүү өтүнүчү менен кайрылды.

Алишер ТОКСОНБАЕВ “АЙМАК”