978 Бардыгы /

БАТКЕН. Мамлекеттик Бажы кызматынын өкүлдөрү аткезчилик жол менен ташылып келаткан он эки тонна мандаринди кармашты. Бул тууралуу Мамлекеттик Бажы кызматынан билдиришти.

Маалыматка караганда, ЕврАзия экономикалык Биримдигинин Бажы аймагына товарларды жана транспорт каражаттарын мыйзамсыз ташып кирүү/чыгуу фактыларын табууга жана бөгөт коюуга багытталган иш-чаралардын жүрүшүндө Кыргызстанга чектеш мамлекеттен мыйзамсыз товар ташып келүү боюнча үч факты аныкталды.

“Баткен” бажысынын кызматкерлери УКМКнын Баткен облустук башкармалыгынын кызматкерлери менен биргеликте Баткен шаарында С.А.Б. аттуу Кыргызстандын жаранынынын башкаруусундагы “Мерседес-Бенц Спринтер” үлгүсүндөгү унааны токтотуп текшеришкен. Унаанын жүк бөлүгүн аңтарганда, мыйзамсыз ташылып келе жаткан жыгач үкөктөрдөгү жалпы салмагы 4 100 кило мандарин табылды. Мындан тышкары Баткен шаарында И.И.А. аттуу Кыргызстандын жаранынын башкаруусундагы “Мерседес-Бенц Спринтер” үлгүсүндөгү унааны дагы токтотуп текшеришкенде, мыйзамсыз ташылып келе жаткан жыгач үкөктөрдөгү жалпы салмагы 3600 кило мандарин ашкереленди. Буга улай Баткен шаарында М.Т.А. аттуу Кыргыз жаранынын башкаруусундагы “Мерседес-Бенц Спринтер” үлгүсүндөгү унааны токтотуп, тинтишкенде, унаанын жүк бөлүгүнөн мыйзамсыз ташылып келе жаткан жыгач үкөктөрдөгү жалпы салмагы 4360 кило болгон мандарин дагы табылды.

Аталган фактылардын баары тең Кылмыштардын жана Жоруктардын бирдиктүү реестрине катталып, материалдар тергөөгө караштуулугу боюнча аймактык укук коргоо органдарына өткөрүлүп берилди.

Алишер ТОКСОНБАЕВ “АЙМАК”