798 Бардыгы /

ЖАЛАЛ-АБАД. Жалал-Абад облусуна караштуу Ноокен райондук соту  аялынын өлүмүнө айыпталып жаткан адамга карата өкүмүн угузду. Ошентип Ноокен районунун Момбеков айылынын тургуну, 1973-жылы туулган, жумушсуз, эки баланын атасы, мурда соттолбогон жаран кылмыш жоопкерчилигине тартылды.

Тергөөнүн жүрүшүндө ырасталгандай, Нурсултан 2020-жылы 12-сентябрда 1968-жылы туулган жубайы Чынара менен жаңжалдашып кеткендиги аныкталган. Уруш-талаш убагында ал ашкана бычагы менен жубайынын көкүрөгүнө сайган. Ушуну менен гана чектелбестен, жыгылгандан кийин ашказанына дагы эки ирет бычак сайганга үлгүргөн. Аялы ошол жерден эле дароо көз жумган.

Айтмакчы, аял өлтүрүлгөн күнү Нурсултан эртең менен эрте туруп, жубайы Чынарага уй сааганга жардамдашып, аларды жайлоого айдап барып, Кочкор-Ата шаарына жумуш издеп кеткен. Бирок иш издөө иштери натыйжасыз аяктагандыгын айткан. Түшкү тамактануу маалында үйүнө келгенде, үйдө тамак жок болгонуна байланыштуу аялы менен урушуп кеткен.

Ошентип соттук-медициналык экспертиза Нурсултандын психикалык жактан саламатчылыгы канааттандырарлык экендигин тастыктады. Сот күбөлөрдүн көрсөтмөлөрүн дыкаат тыңдап, айыпкерди он төрт жылга эркинен ажыратты.

Алишер ТОКСОНБАЕВ, өз кабарчы