873 Бардыгы /

11-майда Кытайдын Сиань шаарында Кыргызстандын тышкы иштер министри Руслан Казакбаев кытайлык кесиптеши Ван И менен жолугушту.

Өлкөнүн ТИМи билдиргендей, тараптар Кыргызстандан Кытайга айыл чарба азыктарын экспорттоону кеңейтүү, «Торугарт» менен «Иркештам» чек ара өткөрмө бекеттеринин ишмердүүлүгүн оптималдаштыруу, соода жүгүртүүнүн көлөмүн көбөйтүү, гранттык долбоорлорду ишке ашыруу, «Кытай-Кыргызстан-Өзбекстан» темир жолун куруу, Кыргызстандын Кытайга болгон карызын жөнгө салуу, Кыргызстан экономикасына түз инвестиция салуу жана биргелешкен инфраструктуралык долбоорлорду илгерилетүү маселесин талкуулашты.

Ван И кытай тарап Кыргызстанга коронавируска каршы вакцинанын экинчи партиясын жөнөтүүнү чечкенин билдирди. Анын алкагында өлкөгө 150 миң доза препарат келет. Мындан тышкары экономиканы колдоо үчүн 350 млн юань (54 млн доллар) бөлүнөрүн, Кыргызстан Кытайга болгон карызын кечеңдеткени үчүн кошумча төлөм алынбай турганын, COVID-19 пандемиясына байланыштуу убактылуу токтотулган гранттык долбоорлорду жүзөгө ашыруу үчүн кытай адистери жөнөтүлөрүн жана азык-түлүктөн жардам берүү маселеси караларын айтты.

Сүйлөшүүлөрдүн жыйынтыгы менен эки өлкөнүн тышкы иштер министрликтеринин 2022-2023-жылдар аралыгындагы кызматташуу программасына кол коюлду.

WWW.