792 Бардыгы /

12-майга карата израиль-палестин жаңжалынан 35 палестин жана беш израиль өлгөнү маалым болду.

Шаршембиге караган түнү Израиль Газа тилкесине жүздөгөн авиасокку урса, ХАМАС баштаган кошуундар Тель-Авив жана башка Израиль шаарларын көздөй жүздөгөн ракета атышты.

Шаршемби күнү эртең менен израилдик аскерлер ХАМАСтын лидеринин Газадагы үйүнө болгон авиасоккудан уюмдун жогорку даражалуу эки мүчөсү мерт болгонун билдирди.

Газа тилкесиндеги «Ислам жихады» тобу Израилге 100 ракета кое бергенин жарыялады. Жалпысынан акыркы суткаларда Палестина тараптан Израилдин аймагына 600дөн ашык ракета атылды.

Өз кезегинде Израиль армиясы 100дөн ашуун палестиналык аскер объектилерине чабуул жасады. Алардын бир бөлүгү калктуу конуштарга жакын жайгашкан. 11-майда палестиналык басылмалар ондогон киши өлгөнүн, бир нече үй зыянга учураганын маалымдады.

Палестинанын Саламаттык сактоо министрлиги авиасоккудан 35 киши, анын ичинде 12 бала, үч аял өлгөнүн билдирди. Дагы 233 адам жаракат алды.

Ракеталык аткылоодон улам Тель-Авивдеги Бен-Гурион атындагы аэропорт жабылып, учактар Каирдеги аэропортко жөнөтүлүүдө.

Эл аралык коомчулук тараптарды сабырдуу болууга чакырды.

Аймактагы акыркы кагылышууларга жөөт тургундардын отурукташуусуна мүмкүнчүлүк берүү үчүн палестиналык үй-бүлөлөрдү Чыгыш Иерусалимдеги конуштардан көчүрүү тууралуу соттун чечими себеп болду. Буга нааразы болгон палестиналыктар 7-майда полиция кызматкерлерине таш, бөтөлкө жана арматураларды ыргытышкан.

Палестиналык басылмалар Израиль нааразы болгондорду таратуу үчүн кулак тундуруучу гранаталарды жана желим окторду пайдаланганын жазды. Андан соң полиция Ал-Акса мечитин күч менен алып, андагы адамдарды аймакты таштап кетүүгө аргасыз кылган.

WWW.