777 Бардыгы /

БАТКЕН. Кыргыз Республикасынын Президенти   Садыр Жапаров Баткен облусуна иш сапарынын алкагында мамлекеттик чек аранын Кыргыз-Тажик тилкесинде болгон окуялардан жапа чегишкен  Баткен облусунун Лейлек районунун Максат айылына баш бакты. Адегенде өлкө жетекчиси тополоңдо талкаланган объектилерди, мунун ичинде өрттөлгөн мектепти көрүп, ошондой эле турак-жай имараттарынын жана билим берүү объектилеринин курулушу, маселен, 100 орунга ылайыкташтырылган эки кабаттуу жаңы бала бакчанын долбоору менен дагы жеринде таанышты.

Президент Садыр Жапаровошондой эле жергиликтүү тургундар менен дагы жолугушуп, алар менен өз ара баарлашууда мамлекеттик чек араны делимитациялоо жана демаркациялоо иштери жөнүндө кеңири баян этти. Анын айтымында, бул маселенин чечилиши аймактын социалдык-экономикалык жактан туруктуу өнүгүүсүнө гана түздөн-түз байланыштуу. Мамлекет башчысы Баткен облусуна мамлекет тарабынан өзгөчө көңүл бурулуп келе жаткандыгын жана мындан ары дагы көңүл буруларын катуу убадалады. Мындын тышкары эми бир дагы жергиликтүү тургун жардамсыз жана керектүү колдоосуз калбастыгына ишендирди. Ошондой эле өлкө башчысы гуманитардык жардамдарды даректүү бөлүштүрүү зарылдыгын кошумчалады.

Баарлашуу убагында жергиликтүү тургундар өткөн окуяларда жапа чекендерге ар тараптан колдоо көрсөтүү, ошондой эле жеке мүнөздөгү бир катар маселелерди көтөрүштү. Алар бийликтин чек ара көйгөйлөрүн чечүү боюнча кылып жаткан аракеттерин колдой тургандыктарын ачык билдиришти. Ошону менен бирге жергиликтүү эл мамлекет тарабынан көрсөтүлүп жаткан колдоого жана өлкөнүн ар тарабынан гуманитардык жардамдар келип жаткандыгын белгилөө менен кыргызстандыктарга терең ыраазычылыгын билдиришти.

Жолугушуунун соңунда Президент Садыр Жапаров тийиштүү мамлекеттик түзүмдөрдүн жана жергиликтүү өз алдынча башкаруу органдарынын өкүлдөрүнө жолугушууда көтөрүлгөн олуттуу көйгөйлөрдү чукул арада чечүү үчүн бир катар тапшырмаларды дагы берди. Ошондой эле бардык объектилерди мерчемделген убакытта калыбына келтирип, куруп бүткөрүүнү өзгөчө талап кылды.

Алишер ТОКСОНБАЕВ