1,437 Бардыгы /

ЖАЛАЛ-АБАД. Жаштар жана жашы жете элек өспүрүмдөр бош жана кечки убакыттарын өткөрүүдө түнкүсүн көчөлөрдө, компьютердик жана интернет клубтарда жүргөн, тилемчилик жана кайырчылык менен алектенген, ошондой эле жаш өспүрүмдөр арасындагы ар түрдүү кылмыштарды жана укук бузууларды жасоого баруусунун алдын алуу максатында Жалал-Абад областынын аймагындагы шаар- райондордо “Өспүрүм-түн” аталышындагы алдын алуу иш-чарасы өткөрүлдү. Бул тууралууу ОИИБдин басма сөз кызматы маалымдады.

Маалыматка ылайык аталган иш-чарага жергиликтүү мамлекеттик администрациялардын өкүлдөрү, саламаттыкты сактоо, социалдык коргоо жана билим берүү органдарынын кызматкерлери, үй-бүлө жана балдарды колдоо комиссиясы жана коомчулук катышты. Иш-чаранын жүрүшүндө жаш өспүрүмдөрдү түндө коштоочусу жок жүрүүсүн аныктоо максатында жер-жерлерде жайгашкан соода түйүндөрү, дыйкан базарлары, автоунааларды жуучу жайлар, набайканалар, кафелер, бильярд клубдары жана башка коомдук жайлардагы ишканалар текшерилди. Андан сырткары ШРИИБдин ыкчам иликтөө бөлүмдөрүнүн кызматкерлеринин катышуусу менен шаар-район аймагында кылмыш жасап изин жашырып качып кеткендер жана дайынсыз жоголгон жашы жете электерди аныктоо максатында тиешелүү ыкчам иликтөө иштери жүргүзүлдү.

Бул иш-чаранын жүрүшүндө коомдук жайларда жана көчөлөрдө жайгашкан – 102жайга текшерүү жүргүзүлүп, ата-энесинин жана башка коштоп алып жүрүүчүсү жок түнкү саат 23-00дөн кийин жүргөн жалпы  – 44жашы жете электер аныкталып, алардын – 27 ата-энелерине Кыргыз Республикасынын Бузуулар жөнүндө Кодексинин 61-бер.1п. негизинде протоколдор толтурулган. Андан сырткары ата-энелердин иштеген жерлерине – 4 сунуш жөнөтүлүп, социалдык өнүгүү бөлүмдөргө 12 материал, балдар  иштери боюнча комиссиясында кароо үчүн  – 4 материал жиберилген. Ошондой эле кылмышка шектүү катары жүргөн 1 өспүрүм тергөөгө камсыздалып, дайынсыз болуп жаткан  – 3 жашы жете элек табылып ата-энелерине өткөрүлүп берилди.

Жергиликтүү бийлик өкүлдөрү жана тургундар тарабынан бул иш-чара эффективдүү экендиги айтылып,тиешелүү кызматтар менен биргеликте дагы да болсо ушул сыяктуу алдын алуу иш-чараларын өткөрүп туруу зарыл экендигин белгилешти.