2,493 Бардыгы /

ОШ. Кара-Суу районунда жем-чөптүн наркы менен мал-жандыктын баасы абдан эле жогорулады. Бул жөнүндө Кара-Суу райондук агрардык өнүктүрүү бөлүмүнүн башчысы Кубаныч Мамедов ачыктады.

Кубаныч Мамедовдун баамында, жемдин, тоюттун, малдын баасы былтыркыга салыштырмалуу абдан эле жогору. Бирок, жакынкы айларга салыштырмалуу турукташып баратат.

• Ушул тапта карата беденин бир таңгагы 330-380 сом, самандын бир

таңгагы 230-280 сом, буудайдын 1 килосу – 30-32 сом, арпанын 1 килосу – 28-30 сом, жүгөрүнүн 1 килосу – 30-40 сомдон сатылууда. А бодо мал орточо 50 миң сомдон 90 миң сомго чейин саоодаланууда. Бир баш койдун орточо баасы 7 миң сомдон 19 миң сомго чейин, жылкы 60 миң сомдон 95 миң сомго чейин, эчки 6 миң сомдон 12 миң сомго чейин сатылып жатат, – деп кошумчалады Кара-Суу райондук агрардык өнүктүрүү бөлүмүнүн башчысы Кубаныч Мамедов.

Бирок, алып сатарлык менен шугурлангандардын айтымында, беденин 1 таңгагы 1-1,5 ай мурун 400 сомдон сатылып жаткан чагы. Ушул тапта 20 сомдон 80 сомго чейин баасы төмөндөгөн. Ал эми буудай, арпа, жүгөрүнүн баасы дагы 5 сого жогорулаган. Буга чейин 20-25 сомдон сатылып жаткан эле. Мындан тышкары мал базарларда малдын баасы 1 ай мурункуга салыштырмалуу баасы жогорулаган. Уйдун баасы 5-10 миң сомго, кой-эчкинин баасы 3-5 миң сомго, жылкынын баасы 10-15 миң сомго көтөрүлдү.

Алишер ТОКСОНБАЕВ, өз кабарчы