1,581 Бардыгы /

Жыл башынан ушул күнгө чейин Жалал-Абад облусунун аймагында 207 өрт кырсыгы катталып, өрттөн 7 жаран каза болуп, 2 жаран жарат алып, келтирилген  материалдык зыян 21 523 305 сомду түзгөн.

Куткаруучулардын аракеттеринин натыйжасында 447 млн.  458 миң сомдон ашуун материалдык баалуулуктар сакталып калынган. Өткөн 2020жылдын ушул мезгилине салыштырмалуу өрттүн саны 12,5 %, ал эми, өрттөн келтирилген материалдык зыяндын көлөмү 2 эсеге өсүп кеткен.

Жогорудагы өрттөрдүн 150сү турак-жай секторунда катталып, жалпы өрт кырсыгынын 72,5 % түздү. Өрт кырсыктарынан 13 мал жандыктары жана 165 тонна кышка камдалган тоюттар жабыркаган. Мындан тышкары жайкы өрт кооптуу мезгилде куураган чөптөрдөөрт кырсыктарын алдын алуу боюнча жүргүзүлгөн иштерге карабастан ачык аймактардагы, жол четтериндеги, адырлардагы куураган чөптөрдө 50 жолу өрт кырсыктары катталып, жалпы 143 га аянттагы куураган чөптөр жабыркаган.

Учурда КР ӨКМнин Жалал-Абад облусу боюнча башкармалыгы  район, шаардык бөлүмдөрү менен биргеликте облус аймагында кылкандуу дан эгиндерин, тоют чөптөрдү жыйноо мезгилинде өрт кырсыктарын алдын алуу боюнча чараларды көрүүдө. 

Урматтуу жарандар! Быйылкы жылы жаан-чачын өз убагында жаабай, суу сактагычтарда суунун көлөмү аз болуп, тоют чөптөрдүн, дан эгиндеринин тартыштыгы байкалууда.  Ал аз келгенсип, жыйылган тоюттарды, дан эгиндерин тилсиз жоо болгон өрт кырсыгы жабыркатууда. Андыктан жайкы өрт кооптуу мезгилде куураган чөптөрдө, тоюттарда жана эгин талааларында, дегеле күнүмдүк турмушта өрт коопсуздук эрежелерин сактоону КР ӨКМнин Жалал-Абад облусу боюнча башкармалыгы эскертет.

Өрт коопсуздук эрежелерин сактоо менен Сиз турак-жайынызды, мүлкүңүздү жана жакындарыңыздын өмүрүн сактап каласыз.

Чынарбек ШЕКЕНОВ, КР ӨКМнин Жалал-Абад облусу боюнча башкармалыгынын Өрт өчүрүү, алдын алуу жана авариялык-куткаруу иштери бөлүмүнүн башчысы, подколковник