30 Бардыгы /

ЖАЛАЛ-АБАД. АКШнын Эл аралык өнүктүрүү боюнча Агенттиги (USAID) Жалал-Абад облусунун Базар-Коргон районунда сарымсакты кайра иштетүүчү ишкананы кеңейтүүгө колдоо көрсөттү. USAID  «Агросоода» долбоорунун алкагында Жаңылай Капарова жетектеген ишканага жапайы сарымсакты кургатуучу жана кесүүчү жабдуу тапшырылды. Мунун натыйжасында ондогон жаңы жумуш орундары түзүлүп, мындан ары Өзбекстанга сарымсакты экспорттоону көбөйтүү мерчемделүүдө.

Ошентип, жаңы жана заманбап жабдуулардын жардамы аркасында аталган ишкананын өндүрүмдүүлүгү дээрилик үч эсеге көбөйүп, сезон сайын  өндүрүлгөн түшүмдүн 30 тоннадан 80 тоннага чейин жетиши күтүлүүдө. Натыйжада Өзбекстанга экспорт гана көбөйбөстөн, сарымсак менен алек болгон жергиликтүү фермерлер дагы мындан айтаарлык пайда көрүшмөкчү. Буга дейре ишкана 15 дыйкандан гана турукутуу сарымсак алып келсе, алдыдагы сезондо ал дагы 220 фермер менен туруктуу иштөөнү пландаштырып жаткан чагы.

• Мен биздин ишканабызга мындан ары көбүрөөк адамдарды жалдай

алабыз деп терең үмүттөнөм. Ушул тапта ишканабызда 10 адам гана туруктуу иштейт. А жаңы жабдууларды ишке түшүргөнүбүздө, дагы 60 адамды сөзсүз жумушка тартабыз, – дейт жеке ишкер Жаңылай Капарова.

Айтмакчы. жапайы сарымсак – дыйкандан чоң чыгымдарды талап кылбай, жаан менен сууга өсөт. Андыктан, дыйкандар алыскы аймактардагы мурда таптакыр пайдаланылбаган жерлерди дагы иштете алышат. Жаңыл айым өндүрүш стандарттарына жооп берген жапайы сарымсак өстүрүү үчүн аны менен иштөөгө кызыккан дыкандарды үйрөтүүгө дагы жардам берип келатат.

• Мындай ишканаларды колдоо айыл чарбанын көп жагына: жеке

фермерлерге, же иштетүүгө, соода жана экспортко, жаңы жумуш орундарын түзүүгө оң таасирин тийгизип жатканына кубанычтабыз! Биздин негизги максат – кыргызстандыктар үчүн экономикалык мүмкүнчүлүктөрдү түзүп, жашоону жакшыртууга салым кошуу! – дейт USAIDдин экономикалык өнүктүрүү кеңсесинин директору Джошуа Темплтон.

USAIDдин Кыргыз Республикасындагы «Агросоода» долбоору Кыргызстандын айыл чарба ишканаларынын атаандаштыкка жөндөмдүүлүгүн арттыруу жана коңшулаш Өзбекстан менен соода мүмкүнчүлүктөрүн азыркыдан дагы кеңейтүү аркылуу Кыргызстанда жумуш орундарын жана кирешелерди жогорулатуу багытында туруктуу иш алып баратат.

Алишер ТОКСОНБАЕВ, өз кабарчы