1,068 Бардыгы /

Баткен облустук соту 6-декабрда Тажикстандын эки жаранына карата чыккан өмүр бою эркинен ажыратуу өкүмүн 15 жылдык жазага алмаштырды. Буга чейин соттолгон Абдурозик Абдукаххоров менен Аскар Юнусовдун жакындары Лейлек райондук сотунун өкүмү боюнча даттанышкан.

Абдукаххоровдун аялы Наргиса Жабборованын айтымында, Баткен облустук сотунун бул чечими тууралуу аларга Тажикстандын Кыргызстандагы элчилигинин өкүлдөрү билдиришкен.

“Биз сот чечимин чыдамсыздык менен күтүп жатканбыз. Күйөөмдүн күнөөлүү экенине ишенбейм. Ал тажик аскерлери менен сүрөткө түшүп койгону үчүн эле өмүр бою соттолгон. Биз өкүмдү толук жокко чыгарып, Абдурозикти актап чыгарууга аракет кылабыз”, — деди Жабборова.

Азырынча Баткен облустук соту тажик жарандарынын өмүр бою эркинен ажыратуу жазасы 15 жылдык жазага алмаштырылганы боюнча маалымат бере элек.

Сентябрда Лейлек райондук соту Абдурозик Абдукаххоров менен Аскар Юнусовду өмүр бою эркинен ажыраткан. Алар Жазык кодексинин 380-беренеси – “Тынчтыкка каршы кылмыштар” жана 391-беренеси – “Талап-тоноочулук” боюнча айыптуу деп табылган.

Октябрь айында Тажикстандын Согди облусунун башчысы Ражаббой Ахмадзода Тажикстандын жарандарына карата чыккан өкүм боюнча Кыргызстандын тиешелүү органдарына кайрылып, өкүмдү кайра карап чыгуу тууралуу өтүнүч кат жөнөткөнүн билдирген.

Наргиса менен Абдурозик тажик жарандары болуп эсептелет, бирок алар Лейлек районуна караштуу Борбордук айылында жашашат. Абдукаххоровдун үй-бүлөсү ушул тапта Тажикстанда.

Абдурозик Абдукаххоров менен Аскар Юнусовду Кыргызстандын күч органдары быйыл май айында, чек арадагы куралдуу жаңжалга байланыштуу кармашкан.

Апрелдин аягында жана майдын башындагы Кыргызстан менен Тажикстандын чек ара аймагындагы куралдуу жаңжалда эки тараптан ондогон жаран каза болуп, үйлөр жана башка объектилер өрттөлгөн. Эки өлкөнүн күч органдары кылмыш иштерин ачышкан.

WWW.