3,741 Бардыгы /

       ЫСЫК-КӨЛ. Ысык-Көл облустук китепканасында Каракол Америка борборуна караштуу «Медиа сабаттуулук жана кибер-коопсуздук боюнча маалымат борбору» расмий түрдө ачылды. Бул иш-чарага Ысык-Көл облусттук акимчилигинин өкүлдөрү жана Каракол Америка борборунун окурмандары катышышты.

          Аталган иш-чарада “Жаш адистер үчүн англис тили” программасынын катышуучулары бул жараянды аяктагандыгы тууралуу сертификат менен сыйланышты.  Бул эки программа тең АКШнын Кыргыз Республикасындагы Элчилиги тарабынан бекем кубаттоого  алынган. 2020-жылдын сентябрь айында Кыргызстандагы АКШ элчилиги Ысык-Көл облусунун жашоочулары үчүн заманбап жана жагымдуу, ошондой эле китепкана топтому, мындан тышкары АКШ мамлекеттик департаменти тарабынан каржыланган ресурстар мүмкүнчүлүгү чектелген адамдарга дагы жеткиликтүү болушу үчүн китепкананын эки бөлүмүн оңдоп-түзөө жана жаңы технологиялар менен камсыздоо иштерине 29000 доллардан ашык каражат ажыраткан. Бул долбоор Кыргыз Өкмөтүнүн көбүрөөк инклюзивдүү коом түзүү аракетин колдоо максатында жүзөгө  ашырылды.

          Ошентип, жакында эле 15 жылдыгын белгилеген Каракол Америка борбору өз коноктору үчүн түрдүү программаларды сунуштап келатат. Булардын ичинде маданий программалар, англис тили боюнча сабактар, VR-программалоо, код жазуу жана катышуучуларга келечекте киреше алып келүүчү чеберчилик боюнча семинарлар дагы байма-бай өткөрүлүп турат. Буга улай китепкананын Кыргызстандагы АКШ Элчилиги колдогон Медиа-борбору жалган маалыматка каршы турууга жана медиа сабаттуулукту жогорулатууга багытталган шаймандарды жана программаларды сунуш этет.

          Каракол калаасындагы Америка борборуна караштуу «Медиа сабаттуулук жана кибер-коопсуздук боюнча маалымат борборунун»  эң башкы максаттарынын бири – Ысык-Көл облусунун тургундарын маалымат, техникалык көндүмдөр менен жабдып, ар кандай медиа булактарынан алынган маалыматка туура баа берүү жана талдоо үчүн критикалык ой жүгүртүү жөндөмдөрүн бекемдөө. Борбор медиа жана компьютердик сабаттуулук боюнча семинарларды сунуштайт жана кесиптик көндүмдөрдү өнүктүрүү, англис тилин үйрөнүү, илимий жана техникалык билимдерди кеңейтүү, ошондой эле Америка Кошмо Штаттары тууралуу ишенимдүү маалымат алуу үчүн акысыз платформа катары кызматын улантат.