1,188 Бардыгы /

Улуттук коопсуздук мамлекеттик комитетинин (мындан ары УКМКнын) төрагасы Камчыбек ТАШИЕВдин уюшкан кылмыштуу топторго (УКТга) аеосуз түрдө күрөш жарыялап, ал өзү түздөн-түз жетектеген атайын операциянын негизинде Кримтөбөл Камчы Көлбаевдин көзүнүн биротоло тазаланышы оштук укук коргоо органдарына дагы майтарылгыс дем-күч берди өңдөнөт. Ош шаардык иштер башкармалыгынын (ШИИБ) кылмыш иликтөө бөлүмүнүн кызматкерлери Ош шаарындагы №5 тергөө абагынан ири маңзат каналын таап, акырында аны дагы жок кылышты.

          Кыргызстадын Түштүк башкалаасынын ШИИБдын басма сөз кызматынан кабарлашкандай, Оштогу маңзат чабармандары Ош шаарындагы №5 тергөө абагына маңзаттарын эч кандай тоскоолдуксуз эле дайыма алып киришип, а түгүл абактагыларга үзгүлтүксүз ири өлчөмдөгү акчага соодалап дагы турушкан. Маселен, 1988-жылы туулган Т. А. мурун деле мыйзамсыз түрдө маңзаттарын соодалагандыгы үчүн соттолгон экен. Тилекке каршы, ал дагыле №5 тергөө абагына камалган күнүнөн тартып, бул кылмыштуу жоруктарын ого бетер өркүндөткөн. Ушул жосунсуз жорукка абакта жатышкан 1986-жылы туулган Г. Г. жана 1988-жылы туулган С. Ш. түздөн-түз көмөктөшкөн. Ал эми 1997-жылы туулган А. Х. мобилдик байланыштар аркылуу буларды сырттагы – эркиндиктеги маңзат чабармандары менен такай байлыныштырып, а түгүл өз ара сүйлөштүрүп дагы турган. Мында 1987-жылы туулган айыпкер А. К. “почточу” кызматын абдан ийгиликтүү аткарган.

          Айтмакчы, Ош шаарындагы №5 тергөө абагындагы маңзат каналын УКТнын Камчы Көлбаев өңдөнгөн жергиликтүү кримтөбөлдөрү өздөрү тынымсыз көзөмөлдөшүп гана турушкан. Буга укук коргоо органдарынын, ошондой эле аталган абактын кызматкерлеринин дагы катыштыгы бардыгы айтылууда. Ошол себептүү УКМКнын опер өкүлдөрү бул өңүттө дагы ар тараптуу иликтөөсүн ого бетер активдештиришти.   

          Алишер ТОКСОНБАЕВ, өз кабарчы