3 Бардыгы /

Бүгүн, 29-май күнү Манас шаарында Кыргыз Республикасынын Президентинин Жалал-Абад облусундагы ыйгарым укуктуу өкүлү Тилек Текебаев жана “Сан Планет Органик” компаниялар тобунун негиздөөчүсү Бекназар Асанов тарабынан Жалал-Абад облусунда өндүрүлгөн жана жыйналган органикалык продукцияны өндүрүү жана экспорттоо багытында кызматташуу тууралуу макулдашууга кол коюлду.

Макулдашууга ылайык, тараптар Жалал-Абад облусунда органикалык айыл чарба продукцияларын өндүрүүнү өнүктүрүү, экспорттук потенциалды жогорулатуу жана аймактагы фермерлерди колдоо боюнча биргелешкен иштерди алып барышат.

Макулдашуунун негизги максаты – Арстанбаптын уникалдуу жаңгак токойлорунун биологиялык потенциалын сактоо, органикалык таза продукцияны өндүрүү жана экспорттоо, фермерлерди окутуу жана айыл жергесинде туруктуу жумуш орундарын түзүү болуп саналат.

Долбоордун алкагында “Сан Планет Органик” компаниясы 2029-жылга чейин кабыктуу жаңгакты сатып алуу көлөмүн жыл сайын көбөйтүп, жалпы көлөмдү 3 миң тоннага жеткирүүнү пландоодо.

Ошондой эле компания Европа Биримдиги жана АКШнын органикалык стандарттарына ылайык эл аралык сертификаттоону жүргүзүп, фермерлерди органикалык дыйканчылык ыкмалары боюнча окутууну уюштурат.

Мындан сырткары жаңгактарды чогултуу, сактоо жана алгачкы иштетүү боюнча заманбап инфраструктураларды куруу, кампаларды, кургатуу жана сорттоо борборлорун түзүү каралган.