Аймак

ОШ ОБЛУСУНУН МЕКТЕПТЕРИ АКШдан САПАТТУУ ГАНА ТАМАК-АШ АЗЫКТАРЫН АЛЫШАТ

ОШ ОБЛУСУНУН МЕКТЕПТЕРИ АКШдан САПАТТУУ ГАНА ТАМАК-АШ АЗЫКТАРЫН АЛЫШАТ

 1,971 Бардыгы /

          ОШ. Кыргызстандын башталгыч класстарынын окуучулары үчүн ысык тамак уюштурууга Ош облусунун 64 мектебине 135 тонна жасмык, буурчак, күн карама майы, ун жана күрүч берилет. АКШнын Кыргызстандагы элчиси Лесли Вигери жана Президенттин Ош облусундагы ыйгарым укуктуу өкүлүнүн орун басары Эрнис Толтоев тамак-аш жеткирүү жараянын адегенде Кара-Суу районунун №139-К.Эрматов атындагы орто мектебинен башташты.

          Бул программа АКШнын Айыл чарба департаменти тарабынан каржыланган Мак Говерн-Доулдун «Билим үчүн азык жана балдардын тамактануусу» Эл аралык программасынын алкагында азык-түлүк жеткирүүнүн экинчи траншы. Программа Кыргыз Республикасынын Саламаттык сактоо министрлиги жана Билим берүү жана илим министрлиги менен өнөктөштүктө гана жүзөгө ашырылууда. Бул азык-түлүктөр Кыргыз өкмөтү тарабынан башталгыч класстардын окуучуларына ысык тамак берүү үчүн бөлүнгөн каражатты гана толуктап турат.

          – Башталгыч класстын ар бир баласынын туура тамактануусу – биздин жалпы максатыбыз. Ал эми Кыргыз Республикасынын Өкмөтү менен болгон өнөктөштүгүбүздүн аркасында биздин күч-аракетибиз максатына жетип олтурат, – деп билдирди АКШнын Кыргызстандагы элчиси Лесли Вигери. –Кара-Суу районунун Ак-Өргө айылындагы №139-К.Эрматов атындагы мектепте башталгыч класстарда окуган 280 бала АКШ өкмөтү тарабынан каржыланган программанын негизинде ысык тамак-аш менен камсыз этилүүдө.

          Президенттин Ош облусундагы ыйгарым укуктуу өкүлүнүн орун басары Эрнис Толтоев учурда Ош облусундагы мектептердин 37 пайызына ысык тамак берилбей жаткандыгын ачык моюндады.  

          Мерсиконун Кыргызстандагы директору Елена Бурян: – Мак Говерн-Доул программасы Кыргызстандагы ар бир баланын өсүп-өнүгүшү жана билим алуусу максатында сапаттуу тамактануусу үчүн иштеп жатат, – дедп агынан жарылды.  

          Ал эми Кара-Суу районунун №139-К.Эрматов атындагы орто мектебинин директору Малике Рахманалиева окуучулары үчүн көзгө көрүнөөрлүк пайдаларды көрүп жатышкандыгы менен бөлүшүштү: – Түшкү ысык тамактын аркасында башталгыч класстын окуучулары окуудан рахат алышып, сабакка катышуусу дагы ого бетер жакшырды.

          Баса, 2021-2023-жылдары Мак Говерн-Доул программасынын биринчи этабында Кыргызстан боюнча 124 мектеп заманбап ашкана жабдууларын алуу, ашпозчуларды жана ашкана кызматкерлерин окутуу аркылуу башталгыч класстын окуучуларын күн сайын ысык тамак менен камсыз кыла башташты. Беш жылдын ичинде программа Кыргыз Республикасынын алты облусунда: Баткен, Жалал-Абад, ЫсыкКөл, Нарын, Ош жана Чүйдө 400дөн ашык мектепти жана 100 миң баланы камтыйт. Бул беш жылдык АКШ өкмөтүнүн Программасынын жаңы айлампасы 2021-2026-жылдарга пландаштырылган.

          Айтмакчы, АКШнын Айыл чарба департаментинин Мак-Говерн-Доулдун «Билим үчүн азык жана балдардын тамактануусу» Эл аралык программасы АКШнын айыл чарба азыктарын, ошондой эле мектеп тамактануусуна финансылык жана техникалык жардам көрсөтүү аркылуу билим берүүнү, балдардын өнүгүүсүн жана азык-түлүк коопсуздугун колдойт. Программа учурда 35 өлкөдө игиликтүү иштеп жатат. Мерсико – Кыргыз Республикасында 1994-жылдан бери өз вазийпасын абийирдүүлүк менен гана аткарып келатат.

Алишер ТОКСОНБАЕВ, өз кабарчы

Автор

Байланыш дареги

Email: aymak.kg@mail.ru

Телефон: +996 (770) 81-00-32

Факс: +996 (3722) 2-32-36

Адрес: Жалал-Абад ш. Ленин к. 17