1,647 Бардыгы /

          ОШ. Батырали Сыдыков атындагы Кыргыз-Өзбек эл аралык университетинин ректорлугуна Абдилбает Мамасыдыков дайындалды. Бул туурасында Билим берүү жана илим министрлигинен билдиришти.

          Ушул жылдын сентябрь айынын башында Билим берүү жана илим министрлиги мамлекеттик жогорку окуу жайлардын жетекчилерин кызматка дайындоо, бошотуу жана аттестациялоо тартиби жөнүндө жобого ылайык, аталган университеттин ректору кызматына ачык сынак жарыялаган эле. Анын жыйынтыгында Абдилбает Мамасыдыков эң жогорку упайга татыды. Ошондуктан, Билим берүү жана илим министрлигинин Укуктук камсыз бөлүмүнүн башчысы Бектур Ибрагимов окуу жайдын жамаатын ректорду дайындоо тууралуу буйрук менен эмгек жамаатын тааныштырды.

          Баса, буга дейре Батырали Сыдыков атындагы Кыргыз-Өзбек эл аралык университетин профессор Чаткалбай Райымбаев жетектеп келген эле. Анын мөөнөтү аяктагандыгына байланыштуу өз арызына ылайык кызматын тапшырган. Чаткалбай Райымбаев 2013-жылы ректорлукка шайланып, 2018-жылы кайрадан экинчи мөөнөткө дагы шайланган.

Алишер ТОКСОНБАЕВ, өз кабарчы