1,347 Бардыгы /

ОШ. Улуттук коопсуздук комитети (УКМК) бир айдан бери издөөдө жүрүшкөн, «Опузалап акча талап кылуу үчүн» айыпталган Ош шаардык ички иштер башкармалыгынын кызматкерлери кармалышкандыгын билдирди. Ошентип, милициянын капитаны Т.Б.Н., милициянын майору И.И.И. жана милициянын капитаны Э.С.Э. ушул тапта тергөө абагына киргизилди.

          Буга дейре УКМК Ош шаардык милицясынын төрт ыкчам кызматкери Ош облусунун тургунун зордуктоого айыпташып, «Кылмыш ишин козгойбуз!» деп коркутуп-үркүтүп, 400 миң сом талап кылгандыгын жар салган. Ал эми ушул жылдын 25-сентябрында бул акчанын алгачкы 100 миң сому берилип жаткан маалда ортомчу киши кармалган. Ал аркылуу милициянын майору Ж.у.Н. кармалган жана анын калган шерик-кесиптештерине дагы дароо издөө жарыяланган. Ички иштер министрлиги бул окуя туурасында азырынча комментарий бере элек.

          Дүйнө жүзүндө жемкорлуктун деңгээлин изилдеген Transparency International уюму былтыркы жылдын жыйынтыгын чыгарып, Кыргызстанда жемкорлук азайган жок деп ачыктаган. Кыргызстан аталган уюмдун индексиндеги жалпы 100 баллдан 27 упай алып, дүйнөдөгү 185 өлкөнүн ичинен 140-орунду ээледи. Кыргызстан ондогон жылдардан бери жемкорлук индексинде 30 упайга жете албай келет. Упай канчалык көп болсо, ошол өлкө жемкорлуктан арылуу жолунда экендигин гана далилдейт.

Алишер ТОКСОНБАЕВ, өз кабарчы