807 Бардыгы /

Кыргызстандын жогорку окуу жайларында билим алып жатышкан чет өлкөлүк студенттер билим берүү акысына мындан ары 3 миң доллардан кем эмес каражат төлөшөт. Бул туурасында Билим берүү жана илим министринин орун басары Расул Абазбек уулу маалымат жыйынында шарданы кылды.

Кыргыз Өкмөтүнүн мүчөсүнүн айтымында, 2022-жылы медициналык билим берген окуу жайларда чет элдик студенттер 3 миң доллардан, ал эми жергиликтүү студенттер 60 миңден кем эмес акча каражатын төлөй тургандыгы белгиленген.

– Чет өлкөлүктөр бир жагынан алганда, инвестор дагы болуп эсептелишет. Алар окууга төккөн акчасынан тышкары, жашаганы үчүн ар кандай кызматтарды алууга каражаттарын жумшашат. Маселен, жыл сайын алар мамлекетке 12-16 миллиард доллардай акча калтырышат. Бул – экономикага кошулуп жаткан салымдардын бири. Ал эми ЖОЖдорго чет элдик студенттерди кабыл алуу боюнча квотага чектөө жок! Талаптарга ылайык, университеттердин клиникалык базасына жараша ооруканасы болуусу кажет. Анткени студенттердин практикалык жактан тажрыйба топтоосу маанилүү! – деп кошумчалады Билим берүү жана илим министри Расул Абазбек уулу.

Баса, билим берүү жана илим министрлигинин акыркы маалыматына караганда, ушул тапта Кыргызстанда 28 миң 800 чет элдик студент билим алып жатышат. Булардын басымдуу бөлүгүн Индия жана Пакистандан келген улан-кыздар түзүшөт.

Алишер ТОСКОНБАЕВ, өз кабарчы